सोलुखुम्बुः  हिमाली जिल्ला सोलुखुम्बु सदरमुकाम सल्लेरी, फाप्लु क्षेत्र विदेशी पर्यटकले खचाखच भरिएका छन् । सगरमाथा क्षेत्रमा सिजन सुरु भएसँगै गाडी मार्फत सल्लेरी भित्रिने विदेशीको चाप अधिक बढेको हो । अहिले दैनिक २०० भन्दा बढी विदेशीहरु स्थलमार्ग हुँदै सल्लेरी तथा फाप्लु क्षेत्र भित्रिरहेको ट्राफिक प्रहरी पोष्ट पत्तालेले जनाएको छ ।

पर्यटकहरु काठमाण्डौँबाट जिप तथा बस मार्फत सल्लेरी भित्रिरहेको यातयात व्यवसायीहरुले बताएका छन् । मौसमका कारण लुक्लामा हवाई उडान प्रभावित भएसँगै गाडी मार्फत सल्लेरी हुँदै खुम्बु जाने विदेशीको संख्या बढेको सोलुखुम्बु सगरमाथा यातयात समितिका अध्यक्ष राम बहादुर विश्वकर्माले बताए ।

पर्यटकका कारण फाप्लु क्षेत्रको होटल तथा लजहरु भरिभराउ भएको छ भने कतिपय पर्यटकहरुलाई बास पाउनै मुस्किल परेको पर्यटक गाईड ङिमा दोर्जी शेर्पाले बताए । काठमाण्डौँबाट आएका अधिकांश पर्यटकको रोजाईमा फाप्लु परेकाले पर्यटक सहयोगीहरुलाई बासको व्यवस्थापन गर्न समस्या परेको उनको भनाई छ ।

फाप्लु क्षेत्रको अधिकांश होटलहरु यतिखेर पर्यटकले भरिएका छन् भने सल्लेरी क्षेत्रको होटलहरु समेत पर्यटकको संख्या अधिक देखिएको सल्लेरीका मिङ्मार शेर्पाले बताए । गाडी मार्फत खुम्बु जाने पर्यटकहरु बढेसँगै सदरमुकाम क्षेत्रमा यतिखेर विदेशीको आवगमन उत्साहजन रुपमा देखिएको प्रहरीले जनाएको छ ।

सल्लेरी हुँदै उकालो लाग्ने पर्यटक बढेसँगै फाप्लु, सल्लेरीबाट थामडाँडा क्षेत्र छुट्ने बोलेरोहरुलाई भ्याई नभ्याई भएको यातयात व्यवसायी लक्ष्मण घतानीले बताए। सडक मर्मतको क्रममा रहेकाले यात्रा जोखिमपुर्ण रहेपनि यात्रुको चापले उत्साह थपिएको उनको भनाई छ । सल्लेरीबाट अहिले बोलेरोले मात्रै खुम्बु पासाङ ल्हामु गाउँपालिका १ थामडाँडासम्म यात्रु बोक्दै आएका छन् ।

थामडाँडा भन्दा माथि सवारी सञ्चालन नहुने भएकाले त्यहाँबाट पर्यटकहरु पदमार्ग हुँदै लुक्ला, नाम्चे तर्फ लाग्ने गरेका छन् । नेपाल सरकारले पर्यटकीय सिजनमा त्रिभुवन विमानस्थल काठमाण्डौँमा विमानको चाप बढी भएको भन्दै लुक्लाको उडान रामेछापको मन्थलीबाट गर्न थालेको छ ।

तर मौसम प्रतिकुलताका कारण केहि दिनदेखि हवाई उडान प्रभावित हुँदा मन्थली पुगेका पर्यटकहरु अलपत्र परेका छन् । जसका कारण स्थलमार्ग हुँदै सल्लेरीबाट खुम्बु पुग्ने पर्यटकहरुको संख्या उच्च रहेको पर्यटन व्यवसायीहरुले बताएका छन् ।