भोजपुरः भोजपुर जिल्लाको दक्षिणी हतुवागढी गाउँपालिकामा भएको जीप दुर्घटनामा परी ११ जना घाइते भएका छन् ।
हसनपुरबाट घोडेटार आउँदै गरेको यात्रुवाहक ल्याण्डरोभर दुर्घटना हुँदा चालकसहित ११ जना घाइते भएका छन् । आज दिउँसो को १ ज ९० नम्बरको जीपको ब्रेक फेल हुँदा २ सय मिटर तल खसेको बताइएको छ ।
दुर्घटनामा रामप्रसाद राई गाउँपालिकाको बासीखोराका मिश्र राई, आमचोक गाउँपालिका देवानटारकी आस्मा राई, रानीबास दितेनीका लङ्कमान राई, देवानटार बयाङका जितमान राई र कुसुम राई घाइते भएका छन् ।
त्यस्तै, रानीबास दितेनीका गोपाल बस्नेत र प्रीतम राई, आमचोक गाउँपालिकाको दाबुराङका सन्तोष चौहान, खैराङका अमर कार्की, होम्ताङका यादव श्रेष्ठ र जीप चालक वराहक्षेत्र–१, सुनसरीका जीवन सुवेदी घाइते भएको जिल्ला प्रहरी कार्यालय भोजपुरका डिएसपी केशवकुमार थेबेले बताए ।
घाइतेमध्ये रानीबास दितेनीका ४६ वर्षीय लङ्कमान राई र दितेनीकै २५ वर्षीय प्रीतम राईको अवस्था गम्भीर रहेको प्रहरीले जनाएको छ । घाइते सबैलाई उपचारका लागि बीपी कोइराला स्वास्थ्य विज्ञान प्रतिष्ठान धरान लगिएको जिल्ला प्रहरी कार्यालय भोजपुरले जनाएको छ ।
_1720278409.jpg)
