इटहरीः ‘आरुसी’ चलचित्रबाट मोडल इसक राईले फिल्म दुनियाँमा डेब्यु गर्दैछन् । ०७६ सालको बैंशाखमा प्रदर्शन मिति राखिएको चलचित्र आरुसीको एउटा गीतको बाहेक सबै छायाङ्कनको काम सकिएको छ । १ करोडको लागतमा निर्माण हुने यस चलचित्रमा झापाली ठिटो राई अडिसनबाट छनोटमा परेका हुन् ।
चलचित्रमा मुख्य भूमिकामा छनोट हुनु अघि उनी काठमाडौंमा रहेर मोडलिङ दुनियाँमा रमाइँरहेका थिए । आधा दर्जन गीतमा अभिनय गरिसकेका राई १ सय ३० युवालाई अडिसनमा उछिनेर ‘आरुसी’को नायकका लागि छनोट भएका हुन् । उदय सुब्बाले निर्देशन गरेको सो चलचित्रको एउटा गीतको छायाङ्कनका लागि नायक राई आइतबार अष्टे«लिया जाँदैछन् ।
अष्ट्रेलियाका रमणीय स्थानमा चलचित्रको एउटा गीतमा उनीसँग रमा लिम्बूले अनस्क्रिन रोमान्स गर्दैछिन् । गीत छायाङ्कनको युनिट कलाकारसहित त्यसतर्फ जान लागेको हो । ताराप्रकाश लिम्बू र विकास चौधरीको सङ्गीत रहेको गीतमा दीपक लिम्बू, ताराप्रकाश र सुम्निमा इङनामको स्वर रहेको छ । चकलेटी कोरियन फेसका राईको चलचित्र ‘आरुसी’को छायाङ्कनसँगै नेपाली फिल्मी बजारमा चर्चा चुलिएको छ ।
‘काठमाडौं बसेर मोडलिङमा सङ्घर्ष गरिहेको झापाली ठिटो चलचित्रका लागि नायकका रूपमा छनोट भएर छायाङ्कनका लागि अष्ट्रेलियासम्मको यात्रा तय गर्छु भन्ने सोचेको पनि थिइनँ’, नवनायक राई भन्छन्, तर, निरन्तरको मिहिनेतले म योग्य ठहरिएँछु । यसमा मलाई गर्व छ ।’ आरुसीमा अभिनय गर्दा गर्दै अन्य २ वटा चलचित्रबाट पनि नायकको भूमिकाको लागि अफर आइसकेको उनी सुनाउँछन् ।
चलचित्रमा इसकसँगै रमा लिम्बू, सुनिल थापा, शुरवीर पण्डित, दमन रुपाखेतीलगायतका कलाकारको अभिनय रहेको छ । यस फिल्मका लागि निर्देशक सुब्बाले नै गीत लेखेका छन् । त्रिकोणात्मक प्रेमकथामा आधारित यस चलचित्रमा सहारा प्रधान, बिरु गुरुङ र केशवकुमार श्रेष्ठको संयुक्त लगानी रहेको छ भने नृत्य निर्देशक दिनेश पाख्रिन र कमल राई रहेका छन् ।
