काठमाडौँः काठमाडौँ महानगरपालिकाका सामुदायिक विद्यालयमा अध्ययनरत ८ हजार १६ जना विद्यार्थीलाई प्रशिक्षण चरणमा छनोट गरेको छ । महानगरपालिकाको स्वर्णिम योजना ‘रचनात्मक विद्यालय’ अन्तर्गत कक्षा ४ देखि १२ सम्मका विद्यार्थीहरुलाई ३ समूहमा बाँडेर छनोट गरेको हो । यसमा कक्षा ४ देखि ८ सम्मका विद्यार्थी एउटा समूहमा छन् । कक्षा १० का विद्यार्थी दोस्रो समूहमा छन् ।
कक्षा ९, ११ र १२ का तेस्रो समूहमा छन् । प्रशिक्षण हुनुपूर्व विद्यार्थीबाट माग गरिएको आवेदनका आधारमा १० हजार ९९५ जना विद्यार्थीले खेलमा रुचि देखाएका थिए ।
उनीहरुको रुचि, शारीरिक अवस्था, खेलप्रतिको पूर्व ज्ञान र छनोटकै दिन प्रदर्शन गरिएको खेल प्रस्तुतिका आधारमा सम्बन्धित खेलका प्रशिक्षकहरुबाट खेलाडी छनोट गरिएको खेल सञ्चालन निर्देशक समितिका संयोजक इञ्जिनियर शैलेन्द्र झाले जानकारी दिए ।
उनका अनुसार छनोट चरणमा प्रशिक्षकहरुको उपस्थिति र सहजीकरण तथा प्रोत्साहनका कारण चरणमा रुचि व्यक्त गर्ने विद्यार्थीको संख्यामा वृद्धि भयो । यसकारण आवेदनमार्फत रुचि व्यक्त गर्नेभन्दा बक्सिङ्, कवड्डी, खोखो र जुडो खेलमा विद्यार्थीको संख्या वृद्धि भएको थियो ।
झाका अनुसार छानिएका विद्यार्थीमध्ये हिउँदे विदाका समयमा एक हप्ताको विशेष प्रशिक्षण प्रदान गरिनेछ । एक हप्ताको प्रशिक्षणपछि खेल्ने अवसर दिएर दोस्रो चरणको छनोट हुनेछ । यस चरणबाट छानिएका विद्यार्थीहरुलाई विशेष निगरानीसहितको नियमित प्रशिक्षण प्रदान गरिनेछ । यसबाट प्रतिस्पर्धाका लागि खेलाडी तयार हुनेछन् ।
सहरी योजना आयोगका सहायक विज्ञ सस्मित पोखरेलका अनुसार प्रारम्भिक चरणबाट अगाडि ल्याउन नसकिएका विद्यार्थीहरुको तथ्याङ्क राखिएको छ । उनीहरुलाई प्रशिक्षणपश्चात् अर्को प्रतियोगिताका लागि तयार गरिनेछ । छानिएका खेलाडीहरुलाई राष्ट्रिय प्रशिक्षकहरुबाट प्रशिक्षण दिइनेछ ।
पोखरेलकाअनुसार आवेदनमार्फत रुचि राख्ने क्रममा सबैभन्दा धेरै फुटबल खेलमा, दोस्रोमा व्याटमिन्टन, तेस्रोमा भलिबल, चौथोमा र पाँचौँमा तेक्वान्दो खेलमा रुचि देखाएका थिए । यसरी रुचि देखाउनेमध्ये फुटबल खेलमा १ हजार २०२ जना विद्यार्थी छानिएका छन् । खेलमा सहभागी हुन २ हजार ३८ जना विद्यार्थीले इच्छा व्यक्त गरेका थिए । छानिएकामध्ये कक्षा ४–८ का ७२२ जना, कक्षा १० का ६६ जना र कक्षा ९, ११ र १२ का ४१४ जना विद्यार्थी छन् ।
व्याटमिन्टन खेलमा ५३५ जना विद्यार्थी छानिएका छन् । यो खेलको प्रशिक्षणका लागि १ हजार २४७ जना विद्यार्थीले रुचि देखाएका थिए । रुचि देखाउनेमध्ये कक्षा ४–८ का ३२२ जना, कक्षा १० का ५१ जना र कक्षा ९, ११ र १२ का १६२ जना विद्यार्थी छानिएका छन् ।
भलिबलमा ७७४ जना विद्यार्थी छानिएका छन् । खेलका लागि १ हजार २४७ जना विद्यार्थीले रुचि देखाएका थिए ।
जसमा कक्षा ४–८ का ३१६ जना, कक्षा १० का १२४ जना र कक्षा ९, ११ र १२ का ३३७ जना विद्यार्थी छानिए ।
क्रिकेटमा ६८२ जना विद्यार्थी छनोट भएका छन् । खेलको प्रक्षिणका लागि ९६० जना विद्यार्थीले रुचि देखाएका थिए । जसमध्ये कक्षा ४–८ का ३६६ जना, कक्षा १० बाट ११४ जना र कक्षा ९, ११ र १२ का २०२ जना विद्यार्थी छनोट भए ।
तेक्वान्दोमा ९१५ जना विद्यार्थी छानिएका छन् । खेलका लागि ९२५ जना विद्यार्थीले रुचि देखाएका थिए । जसमा कक्षा ४–८ का ६८९ जना, कक्षा १० का ८२ जना र कक्षा ९, ११ र १२ का १४४ जना विद्यार्थी छानिए ।
बास्केट बल खेलमा १७८ जना विद्यार्थी छानिएका छन् । यस खेलका लागि ८९९ जना विद्यार्थीले रुचि देखाएका थिए । छानिएकामध्ये कक्षा ४–८ का ११४ जना, कक्षा १० का १३ जना र कक्षा ९, ११ र १२ का ५१ जना विद्यार्थी छन् ।
कराँते खेलमा ५१८ जना विद्यार्थी छानिएका छन् । यस खेलमा ८९३ जना विद्यार्थीले रुचि देखाएका थिए । रुचि देखाउनेमध्ये कक्षा ४–८ का ७६७ जना, कक्षा १० का ५४ जना र कक्षा ९, ११ र १२ का ८३ जना विद्यार्थी छनोट भए ।
कवड्डी खेलमा ७८१ जना विद्यार्थी छानिएका छन् । यस खेलका लागि प्रारम्भिक चरणमा ६९० जनाले रुचि देखाएका थिए । छनोट चरणमा तीव्र इच्छा राख्ने विद्यार्थीहरुलाई अवसर दिएपछि रुचि व्यक्त गर्नेभन्दा छानिएका विद्यार्थीको संख्या धेरै छ । छानिएकामध्ये कक्षा ४–८ का ५११ जना, कक्षा १० का ४३ जना र कक्षा ९, ११ र १२ का २२७ जना विद्यार्थी छन् ।
एथलेटिक्स खेलमा ५१८ जना विद्यार्थी छानिएका छन् । यस खेलमा ५४९ जना विदार्थीले रुचि देखाएका थिए । उनीहरुमध्ये कक्षा ४–८ का ३५७ जना, कक्षा १० का ३३ जना र कक्षा ९, ११ र १२ का १२८ जना विद्यार्थी प्रशिक्षणका लागि छानिएका हुन् ।
बक्सिङ् खेलका लागि ५४९ जना विद्यार्थी छानिएका छन् । खेलका लागि ४७१ जना ले रुचि देखाएका थिए । छनोट चरणमा अवसर माग गर्ने विद्यार्थीको संख्या थपिएसँगै छनोटमा परेका विद्यार्थीको संख्या पनि थपिएको हो । यसमा कक्षा ४–८ का ३२० जना, कक्षा १० का ७१ जना र कक्षा ९, ११ र १२ का १५८ जना विद्यार्थी छन् ।
चेस खेलमा २७५ जना विद्यार्थी छानिएका छन् । यस खेलमा ३४६ जना विद्यार्थीले रुचि देखाएका थिए । जसमध्ये कक्षा ४–८ का १३० जना, कक्षा १० का ३७ जना र कक्षा ९, ११ र १२ का १०८ जना विद्यार्थी छानिएका छन् ।
टेवुलटेनिस खेलमा २१५ जना विद्यार्थी छानिएका छन् । यस खेलमा २७८ जना विद्यार्थीले प्रशिक्षणका लागि रुचि देखाएका थिए । उनीहरुमध्ये कक्षा ४–८ का ९० जना, कक्षा १० का २५ जना र कक्षा ९, ११ र १२ का १०० जना विद्यार्थी छानिएका छन् ।
खोखो खेलमा २७८ जना विद्यार्थी छानिएका छन् । खेलका लागि प्रारम्भिक चरणमा २४५ जना विद्यार्थीले रुचि देखाएका थिए । छनोट चरणमा अवसरका माग भएपछि संख्या थप गरिएको थियो । उनीहरुमध्ये कक्षा ४–८ का १९८ जना, कक्षा १० का ३५ जना र कक्षा ९, ११ र १२ का ४५ जना विद्यार्थी छानिए ।
हक्की खेलमा ११७ जना विद्यार्थी छानिएका छन् । हक्कीमा १४९ जना विद्यार्थीको रुचि थियो । जसमा कक्षा ४–८ का ६३ जना, कक्षा १० बाट कसैको सहभागिता छैन । कक्षा ९, ११ र १२ का ५४ जना विद्यार्थी छन् ।
उसु खेलमा ४६ जना विद्यार्थी छानिएका छन् । यस खेलमा ६६ जना विद्यार्थीले रुचि देखाएका थिए । जसमा कक्षा ४–८ का ४१ जना, कक्षा १० बाट कसैको सहभागिता छैन । कक्षा ९, ११ र १२ का ५ जना विद्यार्थी छानिए ।
जुडो खेलमा ४४ जना विद्यार्थी छानिएका छन् । पहिलो चरणमा यस खेलका लागि ४० जना विद्यार्थीले रुचि देखाएका थिए । छनोट चरणमा विद्यार्थीहरुबाट सहभागिता अवसरका लागि माग भएपछि संख्या थपिएको थियो । जसमा कक्षा ४–८ का ३६ जना, कक्षा १० का १ जना र कक्षा ९, ११ र १२ का ७ जना विद्यार्थी छन् ।
कार्तिकदेखि मंसिर महिनाको पहिलो हप्तासम्म १८ वटा केन्द्रमा विद्याथीहरुलाई भेला गरेर छनोट गरिएको थियो ।
३ महिनाभरि जुनियर छात्र र जुनियर छात्रा तथा सिनियर छात्रा र सिनियर छात्र गरी ४ समूहमा तालिम सञ्चालन हुनेछ । जुनियरमा कक्षा ४ देखि ८ सम्मका विद्यार्थीलाई र सिनियरमा कक्षा ९ देखि १२ सम्मका विद्यार्थीलाई सहभागी गराइनेछ ।
कक्षा १० का विद्यार्थीलाई भने खेलमा भन्दा एसइइको तयारीमा प्रोत्साहन गरिनेछ । खेलका तालिम चलाउन नियमित कक्षा अगाडि, पछाडि, विदाका दिन तथा लामो छुट्टीको अवधिलाई उपयोग गरिनेछ । यसपछि माघको अन्तिम सातातिर संस्थागत र सामुदायिक विद्यालयका विद्यार्थीहरुका बिचमा प्रतियोगिता आयोजना गरिनेछ ।
यसरी आयोजना हुने प्रतियोगितालाई अन्तरराष्ट्रिय मापन पद्धतिअनुसार सञ्चालन गरिनेछ । यसमा हार र जितभन्दा पनि खेल क्षेत्रको प्रवर्धनका मानकहरुलाई नतिजा प्राप्तिको सूचक बनाइनेछ । खेलका लागि सहरी योजना आयोगका सदस्य इञ्जिनियर शैलेन्द्र झाको अध्यक्षतामा ९ सदस्यीय निर्देशक समिति गठन भइसकेको छ ।
_1720278409.jpg)
