काठमाडौंः खाडी मुलुकमा गर्मी बढेसँगै श्रमिकलाई खुला स्थानमा काम गर्न प्रतिबन्ध लगाउन थालिएको छ । साउदीको मानव संसाधन तथा सामाजिक विकास मन्त्रालयले भोलि १५ जुनदेखि सबै निजी क्षेत्रका कम्पनी र प्रतिष्ठानले चर्को घाममा काम गर्ने प्रतिबन्ध लगाउने निर्णय गरेको हो ।
मन्त्रालयले व्यावसायिक सुरक्षा तथा स्वास्थ्य राष्ट्रिय परिषद्को सहकार्यमा आगामी १५ सेप्टेम्बरसम्म दिउँसो १२ देखि ३ बजेसम्म काम गर्न प्रतिबन्ध लगाउने जनाएको छ । मन्त्रालयले यो निर्णय निजी क्षेत्रका कामदारको सुरक्षा र स्वास्थ्य संरक्षण गर्ने उद्देश्यले गरिएको जनाएको छ । यस निर्णयले प्रत्यक्ष घाममा खुला ठाउँमा काम गर्न प्रतिबन्ध लागेको छ ।
यसले उनीहरूलाई सम्भावित स्वास्थ्य जोखिमबाट जोगाउने र अन्तर्राष्ट्रिय पेसागत सुरक्षा र स्वास्थ्य मापदण्डअनुसार स्वस्थ र सुरक्षित कार्य वातावरण प्रदान गर्ने लक्ष्य पनि छ । मन्त्रालयका अनुसार रोजगारदातालाई काम गर्ने घण्टा व्यवस्थित गर्न र यस निर्णयका प्रावधान पालना गर्न आह्वान गरेको छ ।
यसले विभिन्न जोखिमबाट मुक्त सुरक्षित कार्य वातावरण प्रदान गर्न योगदान पु¥याउनेछ र प्रत्यक्ष सूर्यको प्रकाशको सम्पर्कबाट हुने व्यावसायिक चोटपटक र रोग कम गर्न दक्षता र रोकथाम उपाय बढाउनेछ, जसले उत्पादकत्वमा असर पार्नेछ । मन्त्रालयले वेबसाइटमा घाम र गर्मीको प्रभावबाट बच्न व्यावसायिक सुरक्षा र स्वास्थ्यका लागि प्रक्रियागत निर्देशिका प्रकाशित गरेको छ ।
यसले सबैलाई मन्त्रालयको ग्राहक सेवा फोन नम्बर १९९११ वा स्मार्टफोन एप्लिकेसनमार्फत काम प्रतिबन्ध निर्णयको कुनै पनि उल्लंघन बारे सूचित गर्न आग्रह गरिएको छ ।
यसैगरी, संयुक्त अरब इमिरेट्सले भोलि १५ जुनदेखि दिउँसोको काममा प्रतिबन्ध लागू गर्नेछ, जसमा दैनिक १२ः३० देखि दिउँसो ३ बजेसम्म प्रत्यक्ष घाममा बाहिरी काम गर्न निषेध गरिनेछ । दिनको सबैभन्दा तातो समय कामदारलाई सुरक्षित राख्ने उद्देश्यले तीन महिना (१५ सेप्टेम्बर)सम्म यो नियम लागू रहने जनाइएको छ । यो खबर आजको राजधानी दैनिकमा प्रकाशित भएको छ ।
