इटहरीः इटहरीको प्रस्तावित रङ्गशालामा झन्डै ४ हजार बढी दर्शक अटाउने पक्की प्यारापिट छ । तर, खेलमैदानमा बाँसको प्यारापिट समेत बनाइएको छ ।
झन्डै १ हजार दर्शक अटाउने गरी स्टेजबाट दायाँतर्फ बाँसको प्यारापिट छ र दर्शकको चाप पनि त्यही नै छ । संयोगको कुरा पक्की प्यारापिटको तुलनामा बाँसको प्यारापिटमा टिकट शुल्क पनि महङ्गो ।
क्वाटरफाइनल र सेमीफाइनलमा पक्की प्यारापिटमा क्रमश ५० र १ सय रुपैयाँ टिकटदर तोकिँदा बासको प्यारापिटमा भने १ सय र १ सय ५० रुपैयाँ थियो । ‘अग्लो र खेल मज्जाले नियाल्न सक्ने भएकाले बाँसको प्यारापिटमा बढी टिकट शुल्क राखिएको हो,’ आयोजक समितिका संयोजक कोविदजंग कार्कीले भने ।
फुटबल खेलका लागि प्रदेश नम्बर एक उर्वर भूमि मानिन्छ । एन्फाले यस वर्ष सूचीकृत गरेका २३ मध्ये १२ गोल्डकप प्रदेश नं १ मा नै आयोजना हुन्छन् । तर अधिकांश जिल्लामा पक्की प्यारापिटसहितको स्तरीय मैदान छैन । पक्की प्यारापिटको अभावमा प्रतियोगिता आयोजकहरूले लाखौँ खर्च गरेर बाँसको अस्थायी प्यारापिट बनाउनुपर्ने बाध्यता छ ।
आगामी फागुन २३ गतेबाट इलाममा माइभ्याली गोल्डकपको पाँचौँ संस्करण सञ्चालन हुँदैछ गोल्डकपको मिति नजिकएसँगै आयोजकलाई मैदान स्तरीकरण र बाँसको प्यारापिट बनाउन भ्याइनभ्याइ छ । प्रतियोगिता सञ्चालनको लागि २ हजार बढी बाँस प्रयोग गरेर प्यारापिट बनाउनका लागी मात्र कामदारलाई ३ लाख रुपैयाँ आयोजकले दिएका छन् ।
‘कालिगढलाई मात्र ३ लाख रुपैयाँ दिएका छौँ’, माइभ्याली फुटबल क्लबका अध्यक्ष धिरेन चेम्जोङले भने, ‘१ सय १० रुपैयाँ घनाले १ हजार नयाँ बाँस प्रयोग हुन्छ त्यत्तिकै सङ्ख्यामा पुरानो बाँस स्टक छ ।’
आयोजक भन्छन् , ‘बाँसको प्यारापिट बनाउने खर्चले त स्थायी प्यारापिट नै बन्थ्यो’
पूर्वका अधिकांश खेलमैदानमा पक्की प्यारापिट नभएपछि बाँसको प्यारापिट निर्माण गर्नु आयोजकको बाध्यता रहेको चेम्जोङको भनाइ छ ।
अघिल्ला ४ वटा वटा संस्करणमा समेत आयोजकले बाँसकै प्यारापिट बनाएर प्रतियोगिता सफल बनायो । ‘हरेक वर्ष प्यारापिटकै लागि मात्रै ६ लाख रुपैयाँ बढी खर्च हुन्छ’, अध्यक्ष चेम्जोङले भने, ‘४ वटा संस्करण सञ्चालनका लागि बाँसको प्यारापिटमा गरिएको खर्चले त पक्की प्यारापिट नै बन्थ्यो होला ।’
आफ्नै खेलमैदान नहुँदा सेनाको कबाज खेल्ने टुँडिखेलमा बाँसको प्यारापिट बनाएर खेल सञ्चालन गर्नुपरेको उनले बताए । प्रतियोगितामा आउने दर्शकको सहजताका लागि मैदानको तीनैतिर प्यारापिट बनाइने भएको छ ।
पाँचाँै संस्करणमा १० हजार भन्दा बढी दर्शकलाई लक्ष्य गरेर प्यारापिट बनाउने कार्य अगाडि बढाइने आयोजकले जनाएको छ । इलामले मात्र होइन पूर्वका अधिकाँश जिल्लामा आयोजना हुने गोल्डकप प्रतियोगितामा बाँसको प्यारापिट प्रयोग गरिन्छ । ११ जना खेलाडी खेल्न मिल्ने मैदान नभए पनि पाँचथर जिल्लामा राष्ट्रिय स्तरका खेलाडीलाई सहभागी गराएर बर्सेनी फुटबल प्रतियोगिता हुन्छ ।
अघिल्लो वर्ष चैत २५ गतेबाट बैशाख २ गतेसम्म पाँचथर गोल्डकपको दोस्रो संस्करण सम्पन्न भयो । प्रतियोगिता सफल बनाउनका लागि १ लाख ८० हजारको लागतमा ४ हजार जना बस्न मिल्ने गरी अस्थायी बाँसको प्यारापिट बनाइएको आयोजक समितिका उपाध्यक्ष निशान शिवाकोटीले बताए ।
उनले भने ‘नयाँ प्यारापिट बनाउन त ३ लाख बढी खर्च हुन्थ्यो । तर हामीले फाल्गुनन्द गोल्डकप आयोजक फिदिम स्पोर्टिङ क्लबसँग पुरानो बाँस खरिद गरेकाले १ लाख ८० हजारको हाराहारीमा मात्र खर्च भयो’ । गत पुस २१ बाट २९ गतेसम्म फाल्गुनन्द गोल्डकपको १० औ संस्करण फिदिममा नै सम्पन्न भयो । सो प्रतियोगितामा दर्शकलाई बस्नको लागि बाँसको अस्थायी प्यारापिट बनाइएको थियो ।
गोल्डकपको हब झापामा समेत बाँसकै प्यारापिटको भर
सबैभन्दा बढी राष्ट्रिय खेलाडी उत्पादन गर्न सफल जिल्ला झापामा २०७४ फागुन १९ गतेबाट २८ गतेसम्म तेस्रो संस्करणको झापा गोल्डकप फुटबल प्रतियोगिता सम्पन्न भयो । घरेलु टिम झापा–११ लाई दोस्रो पटक पराजित गर्दै नेपाल आर्मीले २०७४ को सिजनको ७ औ उपाधीसहित १२ लाख ५१ हजार हात पा¥यो ।
२०७३ सालमा देशभरमै आयोजना भएका २ दर्जन बढी गोल्डकप प्रतियोगितामध्ये सबैभन्दा बढी पुरस्कार राशी भएको सो प्रतियोगितामा करिब ७ लाख रुपैयाँको लागतमा बाँसको अस्थायी प्यारापिट बनाइयो । झापाको डोमलाल राजवंशी रंगशालामा स्तरीय मैदान भए पनि प्यारापिट भने बाँसकै बनाउनुप¥यो ।
झापामा दर्शकहरूको फुटबल क्रेज देखेर डोमलाल राजवंशी रंगशालामा ७ हजार दर्शक बस्न मिल्ने गरी बाँसको प्यारापिट बनाएर प्रतियोगिता सञ्चालन गरिएको झापा गोल्डकप आयोजक समितिका अध्यक्ष जलकुमार गुरुङ बताउँछन् ।
उनी भन्छन्, ‘३ बजे प्रतियोगिता शुरु हुन्छ दर्शक १२ बजेदेखि नै गेटमा टिकट बोकेर बसेका हुन्छन् । यस संस्करणमा दर्शक नअटेर फाइनलमा ३ हजार कुर्सी समेत थप गर्नुप¥यो ।’ प्रायोजकहरूले पनि सबै सुविधा सम्पन्न स्थानमा प्रतियोगिता आयोजना खोज्नुका साथै मेची रङ्गशालामा २ हजार पनि दर्शक अटाउन मुस्किल भएकाले प्रतियोगिताको सञ्चालनको विकल्पको रूपमा डोमलाल प्रयोग गर्नु परेको गुरुङले बताए ।
वरिष्ठ फुटबल प्रशिक्षक एवम् झापा जिल्ला फुटबल सङ्घका अध्यक्ष भगिरथ आले मामा बाँसको प्यारापिटले नै पूर्वको फुटबल धानेको स्वीकार्छन् । उनी भन्छन्, ‘अहिलेको नेपालमा आयोजना हुने गोल्डकपमा दर्शकको सहजताको लागि नै बाँसको प्यारापिट बनाइएको हो । कहिलेकाहीँ प्यारापिटले नधानेर दुर्घटना निम्तिएका उदाहरण प्रशस्त छन् । यसलाई मध्यनजर गर्दै सरकारले पक्की प्यारापिट बनाउन लगानी गर्नुपर्छ ।’
फागुन १५ देखि २५ गतेसम्म चौथो संस्करणको झापा गोल्डकप प्रतियोगिताको लागि आयोजकले तयारी अगाडि बढाएको छ । यस वर्ष पनि प्यारापिट बाँसकै हुनेछ ।
झापामा पक्की प्यारापिटसहितको खेलमैदान नभएको भने होइन । मेची रङ्गशालामा पक्की प्यारापिट भए पनि खेलकुद मन्त्रालय अन्तर्गतका आयोजना राष्ट्रपति रनिङ शिल्ड लगायतका प्रतियोगिता मात्र आयोजना हुन्छ । आयोजकहरूले आफ्नो क्षेत्रको प्रवद्र्धनको लागि आफ्नो पायक पर्ने स्थानमा गोल्डकप आयोजना गर्ने गरेको जिल्ला खेलकुद विकास समिति झापाका अध्यक्ष शंकर थापा बताउँछन् ।
नेपाल सरकारले गोल्डकप प्रतियोगिताको लागि भनेर बजेट नछुट्याउँदा मेची रंगशालामा १४ वर्षदेखि पूर्वको प्रतिष्ठित त्रिभुवन गोल्डकप प्रतियोगिता सञ्चालन हुन नसकेको थापाले बताए ।
_1720278409.jpg)
