धरानः धरानमा तामाङ ल्होसार भव्यताका साथ मनाइएकोे छ । नेपाल तामाङ घेदुङ धरान उपमहानगर समितिले धरानमा २८५५ (फागु ल्हो सा खाम) औं सोनाम ल्होसार भव्यताका साथ मनाएको हो ।
धरान–८ सभागृह छेउमा पर्वको अवसर पारेर शुभकामना आदानप्रदान कार्यक्रमसँगै तामाङको संस्कृति झल्कने विभिन्न सांस्कृतिक कार्यक्रमहरू गरिएको हो ।
सो अवसरमा लामा गुरुहरूले ‘छेमार’ समेत गरेका थिए । विभिन्न बाधा अड्चनलाई फाल्दै जीवनमा सुख शान्ति मिलोस् भन्ने उद्देश्यले तामाङ समुदायमा छेमार गर्ने प्रचलन छ । उनीहरू तामाङ जातिको मौलिक राष्ट्रिय बाजा डम्फुको तालमा गीतसँगै रमाएका थिए । तामाङ सेलोमा रमाउँदै नृत्य गर्दा सबैले तालीले साथ दिए ।
अघिल्लो वर्षमा भएका नराम्रा कुराहरूलाई बिर्सदै अब आउने नयाँ वर्षहरूमा सबैलाई सुख शान्तिको कामनासहित यो पर्व मनाउने प्रचलन रहेको नेपाल तामाङ घेदुङका नगर अधयक्ष प्रेम वाइबा तामाङले जानकारी दिए । विशेषगरी मञ्जुश्री पात्रोअनुसार प्रत्येक वर्ष माघ शुक्ल प्रतिपदाका अवसरमा विभिन्न कार्यक्रम गरी सोनाम ल्होसार पर्व मनाइन्छ । बाँदर, चरा, मुसा, बाघ, बिरालो, घोडा, सुँगुर, गोरु, खरायो, भेडा, सर्प र ड्रागन गरी १२ वर्गमा सोनाम ल्होसारलाई विभाजन गरिएको छ ।
धरान उपमहानगरपालिकाकी कार्यवाहक मेयर मञ्जु भण्डारी सुवेदीको प्रमुख आतिथ्यतामा सम्पन्न कार्यक्रममा घेदुङका केन्द्रीय वरिष्ठ सल्लाहकार सुजेन्द्र तामाङ, केन्द्रीय सदस्य मैतबहादुर तामाङ, प्रदेश नं. १ का उपाध्यक्ष रामबहादुर ग्याबा, आदिवासी जनजाति महासङ्घका धरान नगर अध्यक्ष सुवास हुक्पाचोङवाङ, सुरज पाख्रिन, समी लामा, उमा लामालगायत विभिन्न जातीय संघसंस्थाका प्रतिनिधिहरूको कार्यक्रममा उपस्थिति थियो ।
कार्यक्रममा सङ्घका वरिष्ठ सल्लाहकार गोले, पनिता तामाङलगायतले शुभकामना मन्तव्य राखेका थिए । कार्यक्रममा धरान–८ का नन्दलाल पाख्रिन, धरान–१६ का जीतबहादुर पाख्रिन, धरान–१९ का चन्द्रबहादुर थिङ, धरान–८ का रामबहादुर योञ्जन, धरान–१९ का प्रतिभा पाख्रिन, जिल्ला डम्फु समूह र २ जना विद्यार्थीलाई सम्मानपत्र र मायाको चिनोले सम्मान गरिएको थियो । यस्तै, रणमाया घिसिङ, छेतबहादुर तामाङ र राममाया तामाङलाई दोसल्ला ओढाई सम्मान गरिएको थियो ।
