पथरीः मोरङको पथरीमा रहेको एक व्यापारिक भवनबाट खसेर १ युवाको रहस्यमय मृत्यु भएको छ ।
पथरीशनिश्चरे ७ बस्ने अन्दाजी २७ वर्षीय षडराज तामाङको बिहीबार राती अन्दाजी साढे १० बजे सो भवनबाट खसेर ज्यान गएको इलाका प्रहरी कार्यलय पथरीले जनाएको छ । सोही व्यापारिक भवनमा रहेको सिक्का लञ्ज एन्ड बारमा साथीको समूहमा आएका तामाङको भवनको चौथो तलाबाट खसेर मृत्यु भएको हो ।
घटना लगत्तै घटनास्थल पुगेको इलाका प्रहरी कार्यलय पथरीको टोलीले मादक पदार्थ सेवन गरेर भुइँमा खसेको अवस्थामा शव भेटेको जनाएको छ । प्रहरीले उनीसँगै बारमा आएका तामाङका ४ जना साथीलाई सोधपुछका लागि नियन्त्रणमा लिएको छ ।
बारमा घटना अघि दमकका ग्राहक र मृतक तामाङको पक्षबीच सामान्य विवाद भएको र बार सञ्चालकबीच समेत सामान्य विवाद भएको प्रहरीको प्रारम्भिक अनुसन्धानबाट खुलेको इप्रका पथरीका प्रहरी निरीक्षक कमल बजगार्इंले बताए ।
तामाङको मृत्यु सुनियोजित हो या दुर्घटना हो भन्ने पूर्ण अनुसन्धान पछि मात्र पत्ता लाग्ने प्रहरी निरीक्षक बजगाईंले बताए ।
यता बार सञ्चालक र अन्य ग्राहकलाई नियन्त्रणमा नलिएर पीडित पक्षलाई मात्र नियन्त्रणमा लिएको भन्दै स्थानीय आक्रोशित बनेका छन् । आक्रोशित स्थानीयले सत्यतथ्य पत्ता लगाई दोषीलाई कानुनी कार्वाहीको माग समेत गरेका छन् । यता, बार सञ्चालकलाई समेत सोधपुछको लागि उपस्थित गराएको र जति सक्दो चाँडो सत्यतथ्य पत्ता लगाउने प्रहरीको भनाइ छ ।
_1720278409.jpg)
