फाइल तस्बिर

इलामः इलामको सन्दकपुर गाउँपालिकास्थित माइपोखरीको अगाडि रहेका होटलहरूमा आगलागी भइरहेको छ ।
आगलागीका कारण सो क्षेत्रमा रहेका ६ घर जलेर नष्ट भइसकेको सन्दकपुर गाउँपालिकाका कर्मचारी सुजन थापाले बताए । आगोले निमा दोर्जे शेर्पा, चक्रबहादुर मुखिया, कमल मुखिया लगायत ६ जनाको घर जलेर नष्ट भएको हो । ती घरमा आधा दर्जन बढी होटल तथा पसल सञ्चालित थिए ।
नेपाली सेना, प्रहरी र स्थानीयले घरमा रहेका सामान बाहिर निकालिरहेका छन् । आगो नियन्त्रण बाहिर रहेको थापाले जानकारी दिएका छन् । आगो नियन्त्रणको लागि इलाम नगरपालिकाको दमकल माइपोखरी पुगेको छ । आगलागी दिउँसो साढे १ बजे शुरु भएको बताइएको छ ।