इटहरी / रुखमा पैसा फल्छ भन्दा तपाईं पत्याउनुहुन्न होला । तर, धरानमा रुखले धमाधम पैसा फलाइरहेको छ । रुखमा घर बनाएर स–साना कटेजहरू निर्माण गरेपछि पर्यटकहरूको आगमन बढेको छ । त्यहाँ प्रवेश गर्न नै टिकट लिनुपर्छ ।
यसरी रुखमा पैसा फलाउँदैछन् धरानको शिरमा रहेको शिवधारा चोकबाट शिव जटा जाने बाटोमा रहेको शुभ गन्तव्य रिसोर्ट र धरान बजारको फेदमा रहेको यलम्बर सामुदायिक वनको पार्क क्षेत्रले । शुभ गन्तव्यमा तीन वटा ट्रि हाउस बनेका छन् ।
गत वर्षको माघ महिनामा निर्माण भएका ट्रि हाउस हेर्न आउनेहरू थुप्रै छन् । हरेक दिन सय भन्दा बढी पर्यटक ट्रि हाउस हेर्न आउने सञ्चालक ओमु राई बताउँछिन् । यी ट्रि हाउस हेर्न प्रवेश शुल्क मात्रै प्रतिव्यक्ति १० रुपैयाँ लाग्छ । औसतमा सय जनाले मात्रै यात्रा गर्दा हरेक दिन १ हजार र हरेक महिना ३० हजार रुपैयाँ प्रवेश शुल्कबाटै आउने कारण यहाँका ट्रि हाउसहरू नै हुन् । शनिबार र सोमबार हुने भीडभाड जोड्दा त यहाँको टिकटको शुल्कले मात्रै मासिक लाख रुपैयाँभन्दा बढी उठ्छ ।
धरानको यलम्बर पार्कले भने प्रवेश शुल्क १५ रुपैयाँ प्रतिव्यक्ति लिन्छ । सामुदायिक वन उपभोक्ता समितिका अध्यक्ष रामबहादुर राईका अनुसार ट्रि हाउस बनेपछि दैनिक १ सय पर्यटकहरू थपिएका छन् । हरेकबाट रु १५ का दरले शुल्क लिएर एक दिनमा १ सय आउँदा दैनिक कमाइ १ हजार ५ सय देखिन्छ । मासिक कमाइ भने ४५ हजार हुने देखिन्छ ।
यसरी रुखमा २ लाख हाराहारीको खर्चमा बन्ने प्रति ट्रि हाउसले हरेक दिन निरन्तर कमाइ दिन थालेपछि रुखले पैसा फलाएको भन्न मिल्ने व्यवसायी बताउँछन् । इटहरीका पर्यटन व्यवसायी सुनिल भुसाल धरानको ट्रि हाउस क्रेज देखेर दङ्ग छन् । २ लाख हाराहारीको लागानीमा बनेको ट्रि हाउसले मासिक ३० देखि ४५ हजार कमाइ हुनु भनेको ७ महिनामा लगानी र ब्याज उठ्ने देखिएको भुसाल बताउँछन् । एउटा गतिलो रुखका काठ काटेर लिने आम्दानी भन्दा चल्तीका पर्यटन केन्द्रका ट्रि हाउसले दिने आम्दानी धेरै देखिएको भुसाल बताउँछन् । यसले रुखको संरक्षण र पर्यटकीय कमाइ सँगसँगै हुने नजिर स्थापित गरेको छ ।
इटहरीको होटल प्रिमियर स्कुलका सञ्चालक समेत रहेका र पर्यटनमै स्नातकोत्तर गरेका भुसाल भन्छन्, ‘यही हेरेर भन्न मिल्छ कि धरानका रुखहरूले पैसा फलाउँदैछन् । अब अन्य सुन्दर क्षेत्रका रुखहरूले कहिले फलाउने पैसा ?’
_1720278409.jpg)
