पथरीः मोरङको बक्राहा खोलाको पानीले कटान शुरु गरेपछि जिल्लाका उर्लाबारी, पथरीशनिश्चरे, रतुवामाई र सुनवर्षी नगरपालिकाका १ हजारभन्दा बढी परिवारमा त्रास फैलिएको छ ।
पथरी शनिश्चरे नगरपालिका वडा नम्बर ५ मा पर्ने सुन्दरी चोक दक्षिणमा रहेको जयनघण्टाबाट बक्राहाले कटान गर्न शुरु गरेको छ ।
खोलाले पुरानो तटबन्धमा कटान शुरु गरेको वडाध्यक्ष जोगबहादुर धिमालले बताए । बिहानैदेखि कटान थालेको नदीले हालसम्म १५ मिटरभन्दा बढी कटान गरिसकेको स्थानीय बताउँछन् । कटान नियन्त्रणका लागि प्रयोग गरिएका ३ वटा तारजालीसहितको स्पेयर मध्ये एउटा स्पेयर भने खोलाले बगाएर लगेको स्थानीयले बताए ।
सो क्षेत्रबाट कटान गरी खोलो गाउँ पसेमा पथरीशनिश्चरे नगरपालिकाको वडा नम्बर ५ का १ हजार ६ सय ६८ घर परिवारको ४ हजार जनसङ्ख्या प्रभावित हुने वडाध्यक्ष धिमाल बताउँछन् । साथै वडा नम्बर ६ को आधा भूभाग, सुनवर्षी नगरपालिकाको वडा नम्बर २ को भूभाग समेत डुबानको चपेटामा पर्ने उच्च जोखिम रहेको छ ।
हाल सो क्षेत्रमा स्काभेटर प्रयोग गरेर स्थानिय सरकारको पहलमा खोलालाई नियन्त्रण गर्ने काम अघि बढाइएको पथरीशनिश्चरे नगरपालिकाका प्रमुख दिलीपकुमार राईले बताए ।
_1720278409.jpg)
