दिगो र सिर्जनात्मक योजना तथा कार्यक्रमको तर्जुमा आवश्यक

‘नेपाल भ्रमण वर्ष २०२०’ का अवसरमा भोलि अर्थात फागुन ९ गतेदेखि १३ गतेसम्म ताप्लेजुङमा पाथीभरा म्याराथन तथा मेची पर्यटन महोत्सव हुँदै छ । ‘पाथीभरा देवीको दर्शन, मेची पर्यटन हाम्रो आकर्षण’ भन्ने मूल नाराका साथ पाथीभरा देवी मन्दिर क्षेत्र संरक्षण तथा सम्वद्र्धन समिति र पाथीभरा क्षेत्र विकास समितिले संयुक्त रूपमा महोत्सवको आयोजना गरेका हुन् ।
पूर्वकै प्रमुख धार्मिकस्थल पाथीभरा, तिम्बुङ पोखरी, विश्वको तेस्रो अग्लो कञ्चनजङ्घा हिमाल, झण्डै ३ सय मिटर अग्लो फुङफुङे झरना, ४ सय वर्ष पुरानो दिकिछ्योलिङ गुम्बा, सोदुङ पोखरी, तीनजुरे– मिल्के– जलजले (टिएमजे) पाँचथरको सिलौटे, लब्रेकुटी, साधुटार, ईलामको कन्याम, श्रीअन्तु, माईपोखरी, सन्दकपुर, गजुरमुखी तथा झापाको केचनाकलन, शिवसताक्षी धाम, दोमुखा, जामुनखाडी, अर्जुनधारा जस्ता मेचीका पर्यटकीय क्षेत्रको प्रचारप्रसार र विकासमा जोड दिँदै यहाँको पर्यटन प्रबद्र्धनमा महोत्सवको योगदान पुग्ने आयोजकको विश्वास छ ।
महोत्सव अवधिभर विश्वको तेस्रो अग्लो कञ्चनजङ्घा हिमाल, प्रसिद्ध तीर्थस्थल पाथीभरा मन्दिर, जैविक विविधताले भरिपूर्ण क्षेत्रमा रहेको तिम्बुङ पोखरी, फुङफुङे झरनालगायतका पर्यटकीय क्षेत्रको हेलिकोप्टरमार्फत् अवलोकन गराइने सचिवालय समितिका संयोजक तारानाथ घिमिरेले बताए । पाथीभरा मन्दिरसहित पूर्वका धार्मिक, सांस्कृतिक र प्राकृतिक पर्यटकीय क्षेत्रमा पर्यटन प्रबद्र्धन गर्ने उद्देश्यका साथ आयोजना हुने महोत्सवको तयारी लगायतका विषयमा महोत्सव सचिवालय समितिका संयोजक तारानाथ घिमिरेसँग गरिएको कुराकानीः

महोत्सवको तयारी कसरी भइरहेको छ ?
पाथीभरा म्याराथन तथा मेची पर्यटन महोत्सवलाई भव्य रूपमा सम्पन्न गर्नका लागि ५ सय १ सदस्यीय मूल आयोजक समितिको गठन भएको छ । विभिन्न उप समितिहरू बनेका छन् । ४७ सदस्यीय सचिवालय समिति बनेको छ । सिक्किम, दार्जिलिङ, कालेबुङ, सिलगुढीसम्म पुगेर पत्रकार सम्मेलन लगायतका माध्ययमबाट प्रचारप्रसार र पर्यटकलाई बोलाउने कार्य भएको छ । काठमाडौंमा रहने ताप्लेजुङबासीको भेला बोलाई संविधानसभा सदस्य पासाङ शेर्पाको संयोजकत्वमा १ सय १ सदस्यीय महोत्सव सहयोग समितिको समेत गठन भएको छ । स्वदेशी तथा विदेशी पर्यटकको आगमनलाई बढाउन हरेक तवरले लागिरहेका छौँ र सिक्किमका मुख्य मन्त्रीलाई समेत महोत्सवमा आउनका लागि विशेष अनुरोध गरेका छौँ । महोत्सवलाई भव्य बनाउन अन्य आन्तरिक तयारी लगायतका  कामहरू करिब करिब पुरा भएका छन् । 

महोत्सवको उद्देश्य के हो ?
ताप्लेजुङमा अवस्थित शक्तिपीठ पाथीभरा मन्दिरसहित पूर्वका धार्मिक, सांस्कृतिक र प्राकृतिक पर्यटकीय क्षेत्रमा पर्यटन प्रबद्र्धनका निमित्त प्रचारप्रसार गर्ने र यी क्षेत्रमा पर्यटन पूर्वाधारको विकासमा सबै सरोकार क्षेत्रको ध्यानाकर्षण गराउने महोत्सवको उद्देश्य हो । कसरी धेरैभन्दा धेरै पर्यटक भित्र्याउन सकिन्छ भन्नेतर्फ हाम्रो ध्यान केन्द्रित छ ।

महोत्सवका आकर्षणहरू के के हुन् ?
महोत्सव अवधिभर विश्वको तेस्रो अग्लो कञ्चनजङ्घा हिमाल, प्रसिद्ध तीर्थस्थल पाथीभरा मन्दिर, जैविक विविधताले भरिपूर्ण क्षेत्रमा रहेको तिम्बुङ पोखरी, फुङफुङे झरना लगायतका पर्यटकीय क्षेत्रको हेलिकप्टर मार्फत् अवलोकन, प्याराग्लाइडिङ, म्याराथन (पुरुष तथा महिला), अन्तर्राष्ट्रिय स्तरको बुद्धिचाल प्रतियोगिता, मेयरकप भलिबल प्रतियोगिता, स्थानीय जातजाति विशेष झाँकी प्रदर्शन, ताप्लेजुङसहित पूर्वका उत्पादनको स्टल, स्थानीय एवम् राष्ट्रिय अन्तर्राष्ट्रिय स्तरका ख्यातिप्राप्त कलाकारहरूको प्रस्तुति, कलश यात्रा आदि मुख्य आकर्षण हुन् । र महोत्सवमा बजार क्षेत्रमा नै भेडाको बथान प्रदर्शनको समेत तयारी भएको छ ।

महोत्सवमा अन्य जिल्लाको सहभागिता कसरी हुन्छ ? र ती जिल्लाको के कस्ता सहयोगको अपेक्षा छ ?
यो महोत्सवमा मेचीका ४ जिल्लाको महत्वपूर्ण सहभागिता हुने भएकाले उनीहरूको सहभागितालाई अर्थपूर्ण बनाउन ती जिल्लाका पर्यटन व्यवसायीसहितको बैठक बोलाइएको छ । बैठकमा छलफलपछि सहभागिता कसरी हुन्छ र के के सहयोग हुन्छन् भन्ने विषयको टुङ्गो लाग्छ ।

महोत्सवले ताप्लेजुङसहित पूर्वी क्षेत्रको पर्यटन प्रबर्घनमा कसरी सहयोग पुग्ला ?
यहाँको आय आर्जनको मुख्य क्षेत्र भनेकै पर्यटन हो । पर्यटनबाट नै यस क्षेत्रको समृद्धि सम्भव देखिन्छ । सम्भावना हुँदाहुँदै पनि अहिलेसम्म उल्लेख्य गतिविधि र पर्याप्त पर्यटन पूर्वाधार विकासका निर्माणका कामहरू हुन सकेका छैनन् । यसैले पनि यो महोत्सवमा पर्यटनसम्बन्धी गतिविधि हुने भएकाले र यस क्षेत्रमा सबैको चासो बढाउने भएकाले उपलब्धिमूलक ठानिएको छ । महोत्सवले जिल्लामा रहेका कञ्चनजङ्घा, कुम्भकर्ण, पाथीभरा मन्दिर, ऐतिहासिक दिकिछ्योलिङ गुम्बा, फुङफुङे झरना, तिम्बुङ पोखरी, सोदुङ पोखरीलगायतका पर्यटकीय गन्तव्यको प्रचारप्रसार हुने भएकाले यी क्षेत्रमा पर्यटकको आकर्षण बढाउन मद्दत पुग्ने विश्वास छ ।

पर्यटन प्रबद्र्धन गर्ने उद्देश्यले मेला महोत्सव भइरहेकै छन् तर पर्यटन पूर्वाधारको विकासमा खास गतिविधि भएको पाइँदैन । यसमा तपाईँको धारण के छ ?
ताप्लेजुङ सुदूर पूर्वको हिमाली जिल्ला हो । पर्यटनका हिसाबले अत्यन्त धेरै सम्भावना भएर पनि पर्यटन पूर्वाधारको विकास नहुँदा पछि परेको यथार्थ छ । आजैदेखि जिल्लावासी एक भएर यहाँको विकासमा जुट्न जरुरी छ । पर्यटन पूर्वाधारको विकास र प्रचारप्रसारका लागि सबै पक्षले आ–आफ्नो तवरले लाग्न आवश्यक छ ।
यस्तै पर्यटन विकासमा तीनै तहको सरकारबाट विनियोजन हुने रकमलाई परिणाममुखी बनाउन दिगो र सिर्जनात्मक योजना तथा कार्यक्रमको तर्जुमा गर्नुपर्दछ । स्थानीय सरकारले आ आफ्ना क्षेत्रमा पर्यटनसँग जोडिने ठाउँहरूको पहिचान गरी गुरुयोजनाका साथ काम गर्न आवश्यक छ । अहिले जिल्लामा पर्यटनको विकासका लागि राम्रै बजेट पनि देखिन्छ । यसलाई सही रूपले उपयोग गरौँ । हिजोभन्दा आज केही परिवर्तन छ र जुट्यौँ भने पर्यटनमा जिल्ला र जिल्लावासीको भविष्य छ । तर सकारात्मक सोचका साथ गतिविधि सञ्चालन हुनुपर्छ ।