यसरी जन्मियो फलैँचा क्याफे

इटहरीः इटहरीमा धमाधम क्याफे खुल्दै बन्द हुँद थिए । सामाजिक अभियानकर्मीको परिचय बनाएका दिव्य गुरुङको मनमा भने बेग्लै खालको क्याफे खोलौँ भन्ने सोच पहिल्यै देखि थियो । तर, जब इटहरीको क्याफे बजारको अवस्था देखे मनमा कता– कता चिसो पस्यो । तर, मनको कुरा न हो, उनले क्याफे खोल्ने निधो गरे । शुरुका ६ महिना सामान्यढंगले क्याफे चलाउने र एकदमै कम लगानी गर्ने सोच बनाए । ‘बन्दै भएपनि धेरै लगानी नडुबोस भनेर मैले यो जुक्ति लगाएको थिएँ । ’ उनले एक वर्ष पहिलेको कुरा सम्झिँदै भने– ‘हौसिएर लगानी गर्दा खेर जाला भन्ने डर अरुलाई जस्तो मलाइ पनि थियो नि ।’

इटहरीको व्यस्त संगित चौक देखि उत्तरपूर्वमा रहेको रातो घरको भुइँ तलामा छ क्याफे । सानो चेपबाट शुरु भएको क्याफेले अहिले रुप फेरेको छ । दिनहुँ हरेक उमेर समुहका ग्राहकको रोजाईमा पर्छ क्याफे । प्लास्टिकजन्य वस्तुको न्युन प्रयोग गरिने हुँदा वातावरणमैत्री बनाइँदैछ । माटोको भाँडोमा चिया दिने नौलो तरिकाले धेरैलाई लोभ्याएको छ । फरक स्वाद, नौलो अभ्यास र सुनसान वातावरण यहाँका विशेषता हुन् । एक छिन समय हुनेहरु साथिसँग गफिन यहाँ पुग्ने गरेका छन् भने प्रशस्त समय हुनेहरु पनि पुस्तक अध्ययन गर्न क्याफे नै पुग्ने गरेका छन् । क्याफेमा मिनि लाइब्रेरिसमेत भएको हुँदा यसको छुट्टै महत्व बढेको छ । नयाँ–पुराना किताब र्याकमा छन् । ग्राहकलाई जुन मन पर्यो त्यो पढ्न छुट छ ।
गुरुङले नाम जुराउन धेरै सोचे । पहाडी जीवनमा फलैँचा थकित भएर बस्ने दोबाटोको आराम गर्ने थलो हो । जहाँ गोठालो, भरिया देखि गन्तव्यमा लम्किरहेका बटुवा भेटिन्छन्  । र, एकैछिन सुस्ताउँदै मनको बह पोख्छन् । उनले यहि सोचेर साथिहरुबीच जम्काभेट हुने र भेट गरेर गफिँदै रम्ने थलो बनाए । जसको नाम दिए ‘चिया गफ अनि साथी’ ।

आज यहि चियाको बहानामा साथीहरुसँग गफ गर्न विहान देखि बेलुकासम्म क्याफेमा भिड लाग्न थालेको छ । हिजो चल्दैन कि भन्ने दिव्यले आज स्टाफ थपेका छन् । सहकर्मी सन्दिप पौडेललाई व्यवसायमा साथीको रुपमा भित्र्याएका छन् । पाँच जनाको क्याफे परिवार यहिँको आम्दानीले पालेको छ भने बैँकबाट लिएको सानो ऋणको किस्ता पनि यहिको आम्दानीले तिरिरहेको गुरुङ बताउँछन् । सानो चेपबाट तीन ठुला सटरमा विस्तार भएको क्याफे विजनेशमा धेरै लगानी नभए पनि करिव ८ लाख खर्च भएको उनले सुनाए ।

‘ठुलो लगानी गरेर हौसिएको थिएँ भने म आज यहाँसम्म कहाँ आउँथे होला र ?’ उनले सुनाए– ‘विजनेशमा ठुलो लगानी गरेर ह्वात्तै कमाउने सोच राख्नु भन्दा सानो पुँजिबाट विस्तारै उठ्न सिक्नुचाहि महत्वपुर्ण कुरा रहेछ भन्ने बुझ्न एक वर्ष लाग्यो । ’
अब पर्यटनसँग जोड्न उनि हरदिन तत्पर छन् । बेलाबेला पर्यटकीय संवाद गराउँदै आएका गुरुङसहितको टीमले पूर्वी क्षेत्रको सम्भाव्य पर्यटकीय गन्तव्यलाई क्याफेसँग जोडेर नवीन कार्यको थालनी गर्ने सोच बनाएका छन् । केहि समय पछि क्याफेको थप विस्तारसहित आकर्षक
साजसज्जामा समय दिने उनको योजना छ ।