इटहरीः आज बिहीबार नेपालमा तीन हजार ६ सय ३७ जना नयाँ कोरोना संक्रमितको पहिचान भएको छ ।
पछिल्लो २४ घण्टामा देशभर १५ हजार दुई सय ५५ जनाको स्वाब परीक्षण भएकोमा तीन हजार ६ सय ३७ जना संक्रमित फेला परेको स्वास्थ्य तथा जनसंख्या मन्त्रालयले जनाएको छ । यससँगै हालसम्म देशभर संक्रमण पुष्टि हुनेको कुल संख्या एक लाख ४८ हजार पाँच सय नौ जना पुगेको मन्त्रालयका प्रवक्ता डा.जागेश्वर गौतमले बताए । उनका अनुसार पछिल्लो २४ घण्टामा देशभरका तीन हजार दुई सय १५ जना संक्रमित निको भएका छन् ।
यससँगै निको हुने संक्रमितको कुल संख्या देशभरमा एक लाख दुई हजार आठ सय २० जना पुगेको उनको भनाइ छ ।संक्रमण मुक्त हुने दर ६९.२ प्रतिशत पुगेको तथ्याङ्कले देखाएको छ । यसैगरी, आज देशभर २१ जना संक्रमितको मृत्यु भई संक्रमणका कारण ज्यान गुमाउनेको कुल संख्या आठ सय १२ जना पुगेको मन्त्रालयले जनाएको छ । मन्त्रालयका अनुसार हाल देशभर ४४ हजार आठ सय ७७ जना सक्रिय संक्रमितहरु रहेका छन् ।
_1720278409.jpg)
