धरानः पोेखरावासी गजलकार प्रकट पंगेनी ‘शिव’ले शनिबार साँझ गजल वाचन गरी धरान र पूर्वी क्षेत्रका साहित्यकारलाई मुग्ध पारेका छन् ।
नौलो किसिमको कार्यक्रम गर्ने उद्देश्यका साथ धरान–१३ ले गठन गरेको कला, साहित्य र संस्कृति प्रतिष्ठानको निम्तोमा पोखरेली गजलकार पंगेनी धरान आएका थिए । करिब डेढ घण्टासम्म उनले यसरी स्रोता र दर्शकलाई मुग्ध पारेः
साँझ थियो, तिमी थियौ, हल्काहल्का मात थियो
जुनेलीको उज्यालोमा, जवानीको बात थियो
गोर्खा डिपार्टमेन्ट सपिङ मलको हलमा आयोजित कार्यक्रममा प्रकटका प्रणय गजलहरूले धरानलाई गजलमय बनाएका थिए । पंगेनीले हरेक गजल सुनाउनुअघि रचनागर्भ पनि बताउँथे । गजलकार पंगेनीले डेढ दर्जन बढी आफ्ना चर्चित प्रणय गजल सुनाएका थिए ।
दुवै मृगौला फेल भएर डाइलाइसिस गराइरहेका धरानका पत्रकार, कवि तथा रङ्गकर्मी प्रवीण राईको उपचार सहयोगार्थ प्रतिष्ठानले धरानमा प्रकटका प्रणय गजलहरू कार्यक्रम आयोजना गरेको थियो ।
प्रतिष्ठानका अध्यक्ष गोपाल श्रेष्ठको अध्यक्षतामा भएको कार्यक्रममा प्रफुल्ल भण्डारीले स्वागत मन्तव्य राखेका थिए ।
_1720278409.jpg)
