इटहरीमा निजी कलेजका विद्यार्थीको आन्दोलनप्रति नागरिक समाजको ध्यानाकर्षण, समस्या सामाधानको लागि पहल गर्ने

इटहरीः नागरिक समाज इटहरीले विगत केही दिनदेखि इटहरीमा निजी क्षेत्रमा सञ्चालित कलेजहरुमा प्लस टु तहमा अध्ययनरत विद्यार्थीहरुले शुल्कको विषयलाइ लिएर प्रारम्भ गरेको आन्दोलनले उग्र रुप लिएको घटनाप्रति नागरिक समाज इटहरीले आफ्नो गम्भीर ध्यानाकर्षण भएको जनाएको छ ।

आइतबार एक विज्ञप्ति जारी गर्दै समाजले इटहरीका निजी कलेजहरुले कोरोना संक्रमणकालीन अवस्था तथा लकडाउनको समयमा पठनपाठनसमेत नभएको अवधिको शुल्क पनि विद्यार्थीहरुबाट असुलउपर गर्न खोजेको भन्दै सोविरुद्ध तमाम विद्यार्थी, अभिभावक तथा विभिन्न राजनैतिक दलनिकट विद्यार्थी तथा युवा संगठनसमेतको सहभागितामा भइरहेको प्रदर्शन र आन्दोलनले निरन्तर उग्र रुप लिएको घटनाप्रति नागरिक समाज गम्भीर बनेको उल्लेख गरेको छ । साथै इटहरीमा सामुदायिक क्याम्पसको रुपमा रहेको जनता बहुमुखी क्याम्पसमा पनि शुल्कको विषयलाई लिएर विद्यार्थीहरु आन्दोलनरत भएको विषयप्रति पनि आफूहरु अत्यन्तै गम्भीर भएको पनि विज्ञप्तिमा उल्लेख छ । इटहरीका निजी कलेजहरु विरुद्धको आन्दोलनले निरन्तर उग्र रुप लिइरहँदा समस्या समाधान हुनेतर्फ कुनै नतिजा प्राप्त गर्न नसक्नु दःुखको कुरा भएको र अर्कोतर्फ जनता बहुमुखी क्याम्पसमा विद्यार्थीहरुले सारेको मागको सम्बन्धमा पनि छलफल गरेर निकर्षमा पुग्न आवश्यक रहेको नागरिक समाज इटहरीका अध्यक्ष सन्तबहादुर डुम्जनले बताए ।

संवेदनशील विषयमा छलफल गर्न शनिबार बसेको नागरिक समाज इटहरीको कार्यसमितिको आकस्मिक बैठकले समाजका अध्यक्ष सन्तबहादुर डुम्जनको अध्यक्षतामा रहेको कार्यसमितिको पदाधिकारीहरुसंमिलित टोलीले समस्या समाधानका लागि सरोकारवाला पक्ष र निकायसमक्ष पहल गर्ने निर्णय गरेको थियो । यही क्रममा नागरिक समाजका पदाधिकारीहरुले आन्दोलनरत विद्यार्थी तथा विद्यार्थी संगठनका केही पदाधिकारीहरु, विभिन्न राजनैतिक दलका प्रतिनिधि र निजी कलेज सञ्चालकहरुसमक्ष समस्या समाधानका लागि आआफ्नो ठाउँबाट संवेदनशील बन्न आवश्यक रहेको साथै विद्यार्थीहरुको मागको सम्बन्धमा समेत गम्भीर बन्नुपर्ने धारणा अगाडि सारिसकेको पनि जानकारी विज्ञप्तिमा गराइएको छ ।

नागरिक समाजले यो समस्या समाधानका लागि आफ्नो पक्षबाट यो पहल गरिरहँदा हाल इटहरीमा देखिएको यो गम्भीर परिस्थितिप्रति जिम्मेवार र संयमित भई यथास्रिघ उचित निकासका लागि पहल गर्न तथा गराउन समग्र सरोकारवाला पक्षहरु इटहरी उपमहानगरपालिका, कलेज सञ्चालकहरु, विद्यार्थी, अभिभावक, विद्यार्थी संगठन तथा विभिन्न राजनैतिक दलका साथै आम नागरिकहरुलाई नागरिक समाजले अपिल गरेको छ ।