सीपले दिलाएको सफलताको कथा

देशमै राम्रो कमाउँछन् राकेश, किन जानु विदेश ?

  • श्रावण ३२, २०७८
  • १००९ पटक पढिएको
  • प्रकाश बन्जारा
alt

इटहरीः कर्म सबैको फरक फरक हुन्छ । कोही मनदेखि नै पढ्छन् , उचित र समयले मागेको शिक्षा आर्जन गर्छन्, अनि त्यस्तै फिल्ड समात्छन् । डाक्टर बन्नको लागि त्यही क्षेत्रको पढाइ गर्नुपर्यो, पाइलट बन्न अर्कै अनि वकिल बनेर वकालत गर्नको लागि पनि छुट्टै विषय लिएर पढ्नुपर्यो । अध्ययन नगरी केहि बन्नुपर्यो भने त्यो हो सीपको काम । सीपको काम भन्नेबित्तिकै सीपसँग सम्बन्धित काम भनेर बुझ्नुपर्छ । कुनै काम गरेपछि तपार्इँ त्यो काममा दक्ष हँुदै जानुहुन्छ । बिस्तारै त्यो क्षेत्रको विज्ञ पनि बन्न सक्नुहुन्छ । तर त्यस्तो सीपको काममा पढाइ अनिवार्य नै भने हँुदैन । हो, त्यस्तै उदाहरण हुन् रामधुनी नगरपालिका, झुम्काका राकेश चौधरी पनि ।

त्यसो भनिरहँदा राकेशले नपढेका भने होइनन् । झुम्काको पुरानो विद्यालय भासी उच्च माध्यामिक विद्यालयबाट एसएलसी सम्मको पढाइ सकेर त्यहीँ उच्च शिक्षा लिँदै थिए राकेश तर खै किन हो पढाइले निरन्तरता पाउन सकेन । १२ कक्षा पढ्दै गर्दा पढाइमा ब्रेक लाग्यो । कुनै कुरामा ब्रेक लाग्नु भनेको पक्कै पनि जीवनको अन्त्य होइन । बरु त्यो त अर्को कुनै कुराको सुरुवात हो । विद्यालय पढाइकै बेला कक्षा ८ तिर अध्ययन गर्दादेखि छिमेकी काकाले सिकेको सीपका सहयात्री रहेछन् राकेश चौधरी । छिमेकी प्रदीप काकाले बिग्रेका मोटर तथा फ्यानको मर्मत गर्ने काम गर्नुहुने रहेछ, आफ्नो पढाइसँगै राकेशले पनि त्यही सिक्न थालेछन् । सानोतिनो काम आफैँ गर्ने, काम नभएको बेला अरुले गरेको हेर्ने गर्दै गर्दा राकेशले पनि काम सिकिहाले । उनलाई मेकानिकल इन्जिनियरिङ्गको अध्ययन नै गर्नु परेन ।

Screenshot 2021-08-16 114341

सानोतिनो काम गरेर पकेट खर्च निकाल्दै गरेका राकेशले पढाइलाई ब्रेक गरेपछि आफँै पङ्खा बनाउने, बिजुलीको जडान गर्नेजस्ता काम खोज्दै गर्न थालेछन् । हुर्कँदो उमेरका साथीहरुसँग मिलेर समूहमै काम गर्दा रहेछन् राकेश पनि । कहीँ नयाँ घर बन्दैछ भने आफू गएर आफूले बिजुलीको काम गर्ने गरेको बताउँदै नयाँ काम लिँदै काम गर्दै गरेका राकेशको समूहका साथीहरु बिस्तारै घट्दै गएछन् । साथीहरु घट्नुको अर्थ काम घट्नु भने होइन रहेछ । कुनै पनि क्षेत्रमा टिकिरहन या त कडा परिश्रम र मेहनत चाहिन्छ या त निष्ठा नै । आफ्नो समूहबाट घटेका धेरै साथीहरु ठूलो कमाउने सुरमा विदेश हाँकिए तर राकेश भने देशमै बस्ने र यहीँ बसेर श्रम गर्ने अठोट गरे । त्यही अठोटले उनलाई अहिले एक सफल व्यक्ति बनाइदिएको छ । साथीहरु विदेश गएपनि उनीहरुको खबर उनलाई आइरहन्थ्यो रे । कोहीले भनेको तलब नपाएको त कोहीले भनेको काम नपाएको अनि कोहि साथी बाकसमा फर्किएको जस्ता सबै कुराले राकेशलाई विदेश जाने मन मोडेको रहेछ । विदेश जानेले कमाउने भनेको क्षणिक पनि त हो नि । यहाँ त आफ्नो सीप अनुसार बजारमा आफ्नो माग बढी नै रहन्छ । अहिले पहिलेजस्तो काम पाउन गाह्रो पनि त छैन । राकेशको अनुभवले पनि त्यही भन्दो रहेछ ।

पहिले काम पाउन निकै गाह्रो थियो । काम दिनुस् भन्दै हिँड्नुपथ्र्यो तर अहिले त्यस्तो छैन । मर्मतको काम र नयाँ कामसमेत फोनमै आउँछ । “मान्छेहरु चिनिएको छ, राम्रो काम गरेपछि आफैँ मान्छेहरुले खोजिखोजी आउँछन् ।” राकेशले हामीसँग भने । राकेश बिजुलीको काम मात्र होइन, प्लम्बिङ्गको काम पनि गर्छन् । उनीसँग अहिले आफ्नै टिम रहेछ । जहाँ काम पायो, आफ्नो टिमलाई लिएर हिँड्दा रहेछन् । पाँच जनालाई त दैनिक ज्याला दिएर राकेशले नै काम लगाउँछन् । सीप सिकेका मिस्त्रीलाई दैनिक आठ सय दिन्छन् अनि सहयोगीलाई ६ सय रुपैयाँ ज्याला दिन्छन् । हिसाब नै गर्ने हो भने दुई सयभन्दा बढी घरको काम गरिसकेको बताउने राकेश परिवारका कान्छा छोरा हुन् । ३३ बर्षको अल्लारे उमेरमै विश्वासिलो टेक्निसियन बनेका राकेशलाई खुुसी लाग्ने कुरा भनेको अहिले बजारमा कुनै राम्रो तथा ठूलो भवन बन्ने भयो भने एकपल्ट उनलाई खबर गरिन्छ, प्राविधिक कुराको लागि ।

प्राविधिक काम भएको हुनाले धारा, पानी तथा बिजुली हामी सबैको मुख्य आवश्यकता हुन् । यी जतिबेलै पनि बिग्रन सक्छन् । यसको काम गर्न विशेष प्राविधिककै जरुरी पर्दछ । फेरी बिजुली र पानीसम्बन्धी काम प्रायः एउटै व्यक्ति तथा समूहले गर्दा सहज र सरल पनि हुने रहेछ । यस्तो प्राविधिक काम सिकेकै कारणले पनि राकेशले कहिल्यै पछाडि फर्केर हेर्नुपरेको छैन । समयसँगै प्रविधिहरु परिवर्तन हुँदै गए । राकेशले प्लम्बिङ्ग, वायरिङ्गको काम सुरु गरेको पनि १२ वर्ष जति भइसकेको रहेछ । तर प्रविधिसँग पनि उनी परिचित नै छन् । कम्पनीहरुले आफ्नो नयाँ उत्पादन तथा सामान आउनासाथ त्यो क्षेत्रका प्राविधिकहरुलाई त्यो सामानको जडान कसरी गर्ने भन्नेजस्ता तालिमहरु दिन्छन् । त्यसैले पनि प्रविधिसँग परिचित भइरहने अवसर जुटेको राकेश बताउँछन् । सुरुवातमा आफूले अरुबाट काम सिकेर यस क्षेत्रमा प्रवेश गरेको भएता पनि पछि प्राविधिक शिक्षा तथा व्यावसायिक तालिम परिषद्बाट (सीटीईभीटी) तालिम लिएर प्रमाणित भएको राकेशले प्रदेश पोर्टललाई बताए ।

ग्राहकबाट पाउने पारिश्रमिकबाहेक बिजुलीका तारहरुमा आउने कुपन तथा पोइन्टहरु यो क्षेत्रका टेक्निसयनका अतिरिक्त आम्दानी हुन् । कम्पनीहरुले पनि आफ्नो सामान बेचाइदिएबापत विभिन्न स्किमहरु दिने गरेका छन् । आफ्ना ग्राहकलाई ठगिनबाट जोगिनको लागि सजग गराइरहने राकेश अहिलेका युवालाई देशमै सीप सिकेर अवसरको खोजी गर्न आग्रह गर्छन् । “तातै खाउँ जली मरौँ भन्नु भएन । विदेश सबैका लागि र सँधैको लागि हुँदैन त्यसैले देशमै बस्नुपर्छ ।” अहिलेका युवालाई लक्षित गर्दै राकेशले हामीसँग भने । आफ्नो मेहनतको कमाइलाई बचत गर्न पनि राकेश उत्तिकै सीपालु रहेछन् । बचतको लागि पाँच वटा सहकारी संस्थामा राकेशको दैनिक आठ सय हाराहारीको बचत रहेछ । कमाइ जे भएपनि आफ्नो काम र आम्दानीसँग सन्तुष्ट रहेको बताउने राकेशले जीवनलाई बिमासँग पनि जोडेका रहेछन् । बचत भनेको भविष्यको लागि हो । अहिले गरेको सानो सानो बचतले सुरक्षित भविष्यको निर्माणमा सहयोग पुर्याउने कुरामा विश्वास राख्दा रहेछन् राकेश पनि ।

निर्माणका काममा खटिरहने राकेशले बचत र लगानीको बाटो शेयर बजारमा पनि देखेका छन् । झण्डै ४ वर्ष भएछ राकेशले शेयर बजार बुझेको । साधारण शेयर अर्थात् आईपीओ भर्न नछुटाउने राकेश चौधरी दोश्रो बजारमा भने छिरिहालेका रहेनछन् । राकेशसँग अहिलेसम्म १२ वटा कम्पनीको स्वामित्व छ । ती कम्पनीले गर्ने नाफामा राकेशको पनि हक लाग्छ । भर्खरै मात्र विवाह बन्धनमा बाँधिएका राकेशको अबको योजना भनेको आफ्नो लागि सानो घर बनाउने र जीवन सङ्गिनीको लागि घरमै एउटा किराना पसल खोल्ने रहेछ ।

प्रतिक्रिया दिनुहोस

महिला सञ्जालका गतिविधि गाउँगाउँमा पुर्याउन इटहरीकी उपमेयर संगीता चौधरीको आग्रह

इटहरीः इटहरी उपमहानगरपालिकाकी नव निर्वाचित उपमेयर संगीता कुमारी चौधरीले महिला संजालका गतिविधी गाउँगा ...

खेलाडीको विवरण संकलन गर्दै प्रदेश खेलकुद विकास बोर्ड

इटहरीः प्रदेश नम्बर एक सरकारको सामाजिक विकास मन्त्रालय अन्तर्गत रहेको प्रदेश खेलकुद विकास बोर्डले प् ...

गरिमा बैंकको वित्तीय साक्षरता कार्यक्रम इटहरीमा सम्पन्न, एक सय तीस बढीलाई बैंकिङ्ग शिक्षा

इटहरीः नेपाल राष्ट्र बैकबाट ‘ख’ बर्गको वित्तीय कारोबार गर्न इजाजत पाएको गरिमा विकास बैँक ...

इष्ट टुरिजम इभेन्ट म्यानेजमेन्ट एण्ड मिडिया प्रालिद्धारा प्रकाशित

प्रदेश पोर्टल डटकम

इटहरी उपमहानगरपालिका, सुनसरी, कोशी, नेपाल

  • कम्पनी दर्ता नं. १९४७९७/०७५/०७६
  • स्थायी लेखा नं. ६०६६४३६५८
  • सूचना विभाग दर्ता नं. ९३०/०७५–०७६
  • प्रेस काउन्सिल दर्ता नं. १७१/०७५–०७६
  • फोन नं.: +९७७ २५ ५८२६९०
  • मोबाइल नं.: +९७७ ९८४२०३७४०२
  • इमेल: pradeshportal@gmail.com
 
 
  • प्रबन्ध सम्पादकः प्रेमप्रसाद बास्तोला
  • प्रबन्धक :शुसिला उप्रेती
  • कार्यकारी सम्पादक :प्रकाश बञ्जरा
  • सह सम्पादक :शिशिर भट्टराई
  • प्रमुख संवाददाता :सुबिन बिश्वकर्मा
  • मार्केटिङ प्रमुख :देवराज पुरी
 

Copyright © 2018 / 2022 - Pradeshportal.com All rights reserved