तेह्रथुम/ तेह्रथुमको फेदाप गाउँपालिकास्थित ह्यात्रुङ झरना पर्यटकीय गन्तव्य बन्दै गएको छ । यहाँ पछिल्लो समय आन्तरिक पर्यटकको भीड लाग्ने गरेको छ ।
वर्षायामसँगै पानीको बहाव बढेपछि झरना अवलोकन गर्न आउने पर्यटकको संख्यामा वृद्धि भएको छ । फेदाप गाउँपालिकाको सम्दु र इसिबुको बीच भागमा रहेको ३ सय ६५ मिटर अग्लो सो झरनासँगै रमाउनेको संख्या दिनप्रतिदिन बढ्दै गएको छ । झरना हेर्न विभिन्न जिल्लाबाट दैनिक रूपमा आन्तरिक पर्यटक आउने क्रम बढेको ह्यात्रुङ झरना एकता समाजका अध्यक्ष राम तिम्सिना बताउँछन् ।
‘समयमै वर्षात् भएपछि झरनामा पानीको मात्रा बढेकाले पर्यटक आकर्षित भएका छन्,’ उनले भने । झरना हिउँदयाममा सुक्खा रहे पनि वर्षात्को समयमा अत्यन्तै आकर्षक र मनमोहक देखिन्छ । फुर्सदको समय तथा बिदाको दिनमा झरना हेर्न दैनिक ५ सय भन्दा बढी पर्यटक आउने गरेका तिम्सिनाले बताए । जिल्लाकै आर्थिक समृद्धिका लागि ठूलो सम्भावना बोकेको ह्यात्रुङ झरना, विकास, संरक्षण, संवद्र्धन र प्रचारप्रसार हुन नसक्दा ओझेलमा परेको छ ।
सुक्खा याममा पानी नहँुदा झरनाको अस्तित्व संकटमा पर्ने भएकाले झरनामा बाह्रै महिना पानी झार्नका लागि आर्थिक वर्ष २०७४÷७५ मा रु ३० लाख बजेट विनियोजन गरिएको फेदाप गाउँपालिकाका अध्यक्ष हरि चोङ्वाङले बताए । झरनासम्म पानीको व्यवस्थापनका लागि अहिले पाइपलाइन बिस्तारको काम भइरहेको छ ।
प्राकृतिक झरनाले पर्यटकलाई आकर्षण गरे पनि झरना वरपर पर्यटकीय पूर्वाधार र संरचना निर्माण नहुँदा तथा झरनाको प्रचारमा सम्बन्धित निकायले चासो दिएको छैन । झरना अवलोकन गर्न पुगेका संक्रान्तिबजारका टाँसी लामा झरनासम्म पुग्ने मोटरबाटो खनिए पनि वर्षात्को समयमा सडक हिलाम्मे हुँदा आठराई र फेदापदेखि पदैल यात्रा गर्नुपरेको बताउँछन् ।
जिल्लाका पर्यटकीय गन्तव्यमध्ये यो झरना धेरैको रोजाइमा पर्छ । झरनामा पुगेर पर्यटक आनन्द लिने गर्छन् । उक्त झरनाको पूर्वाधार विकास, प्रचार र प्रवद्र्धन गर्न सके थप पर्यटक भित्र्याउन सकिने स्थानीयवासी बताउँछन् ।
सदरमुकाम म्याङ्लुङ र आठराई संक्रान्तिबजार प्रवेश गर्ने जो कोहीलाई पनि उक्त झरनाले आकर्षित गर्न थालेको छ । झरनामा तेह्रथुम, पाँचथर, ताप्लेजुङ, धनकुटा, झापालगायत जिल्लाबाट मनोरञ्जनका लागि आन्तरिक पर्यटक आउने गर्छन् ।
_1720278409.jpg)
