इनरुवाः सामाजिक सञ्जालमार्फत चिकित्सकको चरित्र हत्या र अस्पतालको बद्नाम गर्न खोजिएको भन्दै जिल्ला अस्पताल सुनसरी इनरुवाका डाक्टर आन्दोलित भएका छन् ।
आन्दोलित डाक्टरहरुले दोषी उपर कार्वाहीको माग गर्दै जिल्ला प्रशासन कार्यालय सुनसरीअगाडि धर्ना दिएका छन । मेसु डाक्टर देबराज घिमिरेसहित धर्नामा बसेका डाक्टरहरुले सामाजिक सञ्जालमार्फत् आफुहरुउपर अनाहकको लाञ्छना लगाइएकाले आन्दोलनमा उत्रनु परेको बताए ।
प्रशासनमा धर्ना बसेका डाक्टरहरुले आफुहरुको मान–सम्मानमा चोट पुग्ने खाले अभिव्यक्ति दिने सामाजिक सञ्जाल प्रयोगकर्ता पशुपति दाहालउपर कारबाहीको माग गरे । उनीहरुले प्रमुख जिल्ला अधिकारी इन्द्रदेव यादव समक्ष ज्ञापन पत्रसमेत बुझाएका थिए ।
धर्नास्थलमै डाक्टर भेट्न पुगेका प्रजिअ यादव समक्ष आन्दोलित डाक्टरहरुले शान्तिपूर्ण तवरले काम गर्ने वातावरण नभएको भन्दै चिन्ता व्यक्त गरेका छन । सो क्रममा अस्पतालका मेसु डाक्टर घिमिरेले अस्पताल सुधारमा लागेको आफुलगायतको टिममाथि विभिन्न आरोप र अपजस लगाइँदै आएकाले निर्धक्कसाथ स्वास्थ्य सेवामा खटिने वातावरण बनाइनुपर्ने बताए ।
आन्दोलनमा उत्रनु परेको कारण जानकारी गराउँदै मेसुले भने, ‘उपचार गराउन आउनु भएकी व्यक्तिमा चेकजाँचका क्रममा मुटुको समस्या पाइदा जटिल प्रकृतिको भएकाले अन्यत्र उपचार गराउन भनिएको थियो ।’
![](/uploads/advertise/790b32bb-f3fc-44ee-8f58-34eab4674ffa_1719835335.jpg)
उनले थपे, ‘परिवारले बिरामीलाई उपचारका लागि काठमाडौंको शहीद गंगालाल हृदय रोग प्रतिष्ठानमा उपचारका लागि पु¥याएका रहेछन । त्यहाँको रिपोर्टलाई आधार मान्दै पशुपति दाहालले इनरुवा अस्पताल र डाक्टर उपर गम्भिर आरोप लगाउँदै सामाजिक सञ्जालमा पोष्ट गरेको पाइयो । जस पश्चात सामाजिक सञ्जालमा आफुहरु उपर गालीगलौज, मानहानी, धम्कीपूर्ण भाषा प्रयोगको क्रम बढेकाले सत्यतथ्य छानविन गरी कार्वाहीको माग सहित आन्दोलित बन्न बाध्य भएका हौं ।
ज्ञापन पत्र बुझ्दै अवरुद्ध स्वास्थ्य सेवा सञ्चालनमा ल्याउन आग्रह गरेका प्रजिअ यादवले घटनाक्रमप्रति आफ्नो ध्यानाकर्षण भएको बताए । प्रजिअ यादवले स्वास्थ्य सेवा र सेवा प्रवाहमा खटिने डाक्टर लगायत स्वास्थ्यकर्मीको सुरक्षा र अधिकारको सवालमा प्रशासन कटिबद्ध रहेको बताए । उनले सामाजिक सञ्जालको दुरुपयोग भएको पाइएकाले कानूनी दायरामा ल्याइने बताए ।
धर्नाकैबीच डाक्टरहरुले दोषी भन्दै कार्वाहीको माग गरेका बलाहाका पशुपति दाहाललाई प्रशासनले झिकाएको थियो । सो क्रममा प्रजिअकै सामुन्नेमा दाहालले आमा बिरामी हुँदाको पीडा र उपचारमा भएको खर्चको विषयलाई लिएर आफुले सामाजिक सञ्जालमा व्यक्त गरेको भावमा अन्यथा लाग्न गएको भन्दै लिखितसहित सार्वजनिक माफी मागेका छन् । उनले आफ्नो पोस्टमा अन्यले गरेको फोहोरी कमेन्टप्रति आफुलाई समेत लज्जाबोध भएको बताए ।