इटहरीः उज्यालो नेपाल पार्टीले स्थानीय सरकारलाई दलीय प्रतिस्पर्धा र राजनीतिक भागबन्डाको केन्द्र नभई जनसेवा, सुशासन र स्थानीय विकासको प्रभावकारी माध्यम बनाउनुपर्नेमा जोड दिएको छ। पार्टीका तर्फबाट अध्यक्ष कुलमान घिसिङले निर्वाचन आयोगलाई ज्ञापनपत्र बुझाउँदै यस्तो जोड दिएका हुन् ।
पार्टीका अनुसार स्थानीय तहको निर्वाचनमा उम्मेदवारको राजनीतिक दलसँगको आबद्धताभन्दा उसको योग्यता, इमानदारी, कार्यक्षमता, स्पष्ट कार्ययोजना र जनताप्रतिको जवाफदेहितालाई प्राथमिकता दिनुपर्छ।
स्थानीय सरकार जनताको साझा सरकार भएकाले यसको नेतृत्व चयन गर्दा दलीय स्वार्थभन्दा स्थानीय आवश्यकता र नागरिकको हितलाई केन्द्रमा राख्नुपर्ने पार्टीको धारणा छ।
पार्टीले गैरदलीय स्थानीय निर्वाचनको अवधारणा बहुदलीय लोकतन्त्रको विरोध नभएको स्पष्ट पारेको छ। बरु यसलाई स्थानीय सरकारलाई थप नागरिकमुखी, निष्पक्ष र परिणाममुखी बनाउने सुधारको प्रस्तावका रूपमा व्याख्या गरेको छ।
स्थानीय तहमा राजनीतिक प्रतिस्पर्धा र भागबन्डाका कारण विकास निर्माण तथा जनसेवाका काम प्रभावित हुन नदिन गैरदलीय निर्वाचन प्रणाली उपयोगी हुन सक्ने पार्टीको तर्क छ।
विदेशमा रहेका नेपालीलाई पनि मतदानको व्यवस्था गर्न माग
उज्यालो नेपाल पार्टीले रोजगारी, अध्ययन, व्यवसायलगायत विभिन्न कारणले विदेशमा रहेका नेपाली नागरिकलाई पनि आफ्नो स्थायी ठेगाना रहेको स्थानीय तहको निर्वाचनमा मतदान गर्न पाउने व्यवस्था मिलाउन माग गरेको छ।
देशको अर्थतन्त्र र विकासमा महत्त्वपूर्ण योगदान गरिरहेका विदेशस्थित नेपाली नागरिकलाई लोकतान्त्रिक प्रक्रियामा सहभागी हुने अवसरबाट वञ्चित गर्न नहुने पार्टीको भनाइ छ।
विदेशमा रहेका नेपालीले पनि आफ्नो देशको नेतृत्व चयन गर्ने प्रक्रियामा सहभागी हुन पाउनुपर्ने उल्लेख गर्दै पार्टीले मतदान अधिकार सुनिश्चित गर्न आवश्यक कानुनी तथा प्राविधिक व्यवस्था गर्न आग्रह गरेको हो।
पार्टीले विदेशमा रहेका नेपालीको मतदान अधिकार कार्यान्वयनका लागि सरल, सुरक्षित, कम खर्चिलो र अधिकतम सहभागिता सुनिश्चित गर्न सक्ने प्रणाली विकास गर्नुपर्नेमा जोड दिएको छ।
मतदान प्रणालीबारे अध्ययन भइरहेको निर्वाचन आयोगको भनाइ
ज्ञापनपत्र ग्रहण गर्दै प्रमुख निर्वाचन आयुक्तले विदेशमा रहेका नेपाली नागरिकको मतदान अधिकार कार्यान्वयनका लागि उपयुक्त मतदान प्रणालीबारे आयोगले अध्ययन गरिरहेको जानकारी दिएको पार्टी अध्यक्ष घिसिङले सार्वजनिक गरेको विवरणमा उल्लेख छ।
विदेशमा रहेका नेपालीको मतदान अधिकार सुनिश्चित गर्दा मतदान प्रक्रिया सहज र सुरक्षित बनाउनुपर्ने तथा अधिकतम नागरिकको सहभागिता सुनिश्चित गर्नुपर्ने विषयमा आयोगले अध्ययन गरिरहेको जनाइएको छ।
निर्वाचन प्रणालीमा सुधारका लागि सरकार, निर्वाचन आयोग र राजनीतिक दलहरूबीच व्यापक छलफल, सहमति र समन्वय आवश्यक रहेको धारणा पनि प्रमुख निर्वाचन आयुक्तले व्यक्त गरेको विवरणमा उल्लेख छ।
कानुनी र संस्थागत सुधारका लागि आग्रह
उज्यालो नेपाल पार्टीले दुवै विषयलाई कार्यान्वयनमा लैजान आवश्यक कानुनी, प्राविधिक तथा संस्थागत सुधारका लागि समयबद्ध पहल गर्न आग्रह गरेको छ।
स्थानीय तहको निर्वाचन प्रणालीलाई जनमुखी बनाउने र विदेशमा रहेका नेपाली नागरिकलाई लोकतान्त्रिक प्रक्रियामा सहभागी गराउने विषयलाई निर्वाचन सुधारको महत्त्वपूर्ण एजेन्डाका रूपमा अघि बढाउनुपर्ने पार्टीको भनाइ छ।
पार्टीले स्थानीय तहमा योग्य, इमानदार र जनउत्तरदायी नेतृत्व स्थापित गर्नुका साथै संसारको जुनसुकै कुनामा रहेका नेपाली नागरिकलाई नेपालको लोकतान्त्रिक प्रक्रियासँग जोड्ने आफ्नो उद्देश्य रहेको जनाएको छ।
सुशासन, समृद्धि र सामाजिक न्यायप्रतिको प्रतिबद्धताअनुरूप यी विषयमा निरन्तर पहल गर्ने अध्यक्ष कुलमान घिसिङले बताएका छन्।
स्थानीय निर्वाचनलाई गैरदलीय बनाउने प्रस्ताव र विदेशमा रहेका नेपालीलाई मतदान अधिकार दिने माग कार्यान्वयन गर्न कानुनी तथा नीतिगत परिवर्तन आवश्यक पर्न सक्ने भएकाले अब निर्वाचन आयोग, सरकार र राजनीतिक दलहरूबीच हुने छलफलले यी विषयको आगामी दिशा निर्धारण गर्नेछ।
