चेङ्दुः राष्ट्रिय स्वतन्त्र पार्टी (रास्वपा) को उच्चस्तरीय प्रतिनिधिमण्डलले चीनको सिचुवान प्रान्तसँग विपद् जोखिम न्यूनीकरण, पूर्वाधार, स्वच्छ ऊर्जा, पर्यटन, व्यापार तथा डिजिटल नवप्रवर्तनका पाँच प्रमुख क्षेत्रमा सहकार्य प्रस्ताव गरेको छ।

रास्वपाका महामन्त्री विपिनकुमार आचार्य नेतृत्वको प्रतिनिधिमण्डलले चिनियाँ कम्युनिस्ट पार्टीका सिचुवान प्रान्तीय सचिव तथा प्रान्तीय जनकांग्रेस स्थायी समिति अध्यक्ष वाङ स्याओहुईसँग चेङ्दुमा भेटवार्ता गर्दै नेपाल–चीन सम्बन्धलाई विकास, लगानी र साझा समृद्धिमा केन्द्रित व्यावहारिक साझेदारीका रूपमा अघि बढाउने विषयमा छलफल गरेको हो।

भेटमा नेपाली प्रतिनिधिमण्डलले नेपाल र चीनबीचको ऐतिहासिक मित्रतालाई आर्थिक तथा सामाजिक विकासका क्षेत्रमा परिणाममुखी सहकार्यमा रूपान्तरण गर्नुपर्नेमा जोड दिएको जनाएको छ।

तेस्रो, स्वच्छ ऊर्जा तथा हरित उद्योग। नेपालको जलविद्युत् सम्भावना र सिचुवानको ऊर्जा तथा औद्योगिक अनुभवलाई जोडेर लगानी, प्रविधि हस्तान्तरण तथा उत्पादन साझेदारी विस्तार गर्न प्रस्ताव गरिएको छ। जलविद्युत्सँगै हरित हाइड्रोजन, रासायनिक मल, विद्युतीय सवारीसाधन तथा ब्याट्री उत्पादनमा सहकार्यको सम्भावना पनि छलफलमा उठाइएको छ।

चौथो, हवाई सम्पर्क, पर्यटन तथा व्यापार प्रवर्द्धन। चेङ्दुबाट काठमाडौं, पोखरा र भैरहवातर्फ थप प्रत्यक्ष हवाई उडानको सम्भावना खोज्न नेपाली पक्षले आग्रह गरेको छ। यसले पर्यटन, व्यावसायिक आवागमन र दुई देशका नागरिकबीच सम्बन्ध विस्तारमा सहयोग पुग्ने विश्वास व्यक्त गरिएको छ। साथै नेपाली जडीबुटी, चिया, फलफूल तथा हस्तकलाका उत्पादन चीनमा निर्यात बढाउन प्रशोधन, भण्डारण, गुणस्तर मापदण्ड र बजार पहुँचमा सहयोग माग गरिएको छ।

पाँचौँ, युवा तथा डिजिटल नवप्रवर्तन। नेपालका प्रविधिमा रुचि राख्ने युवालाई सिचुवानको अनुसन्धान तथा प्राविधिक क्षमतासँग जोडेर कृत्रिम बुद्धिमत्ता (एआई), सफ्टवेयर इन्जिनियरिङ, प्राविधिक तालिम तथा हरित डेटा सेन्टरका क्षेत्रमा सहकार्य गर्न प्रस्ताव गरिएको छ। संयुक्त अनुसन्धान र ज्ञान आदानप्रदानबाट युवाका लागि नयाँ अवसर सिर्जना गर्न सकिने र प्रविधिमा आधारित विकासलाई गति दिन सकिने प्रतिनिधिमण्डलको धारणा छ।

सिचुवान प्रान्तीय सचिव वाङले नेपाल र चीनबीच बेल्ट एन्ड रोड सहकार्य क्रमशः अघि बढिरहेको उल्लेख गर्दै नेपालसँग निकट सम्बन्ध भएका चिनियाँ प्रान्तमध्ये सिचुवान पनि एक रहेको बताएका थिए।

नेपाल र चीनका राजनीतिक नेतृत्वबीच भएका महत्त्वपूर्ण समझदारी कार्यान्वयनमा योगदान गर्ने प्रतिबद्धता व्यक्त गर्दै उनले रास्वपा प्रतिनिधिमण्डलको भ्रमणलाई दुई पक्षबीच पार्टीगत तथा सरकारी तहको सम्बन्ध विस्तार, रणनीतिक सहकार्य र नयाँ साझेदारीका क्षेत्र पहिचान गर्ने अवसरका रूपमा लिएको बताएका थिए।

महामन्त्री आचार्यले सिचुवानको आर्थिक तथा सामाजिक विकासको प्रशंसा गर्दै नेपालको विकासमा चीनले लामो समयदेखि पुर्‍याउँदै आएको सहयोगप्रति धन्यवाद दिएका थिए। चीनको पश्चिमी क्षेत्रको महत्त्वपूर्ण प्रान्त सिचुवानलाई नेपालका लागि विश्वसनीय तथा दीर्घकालीन साझेदारका रूपमा उल्लेख गर्दै पारस्परिक लाभका क्षेत्रमा सम्बन्ध विस्तार गर्न रास्वपा इच्छुक रहेको जनाएको छ।