धरानः बराह बचत तथा ऋण सहकारी संस्था लिमिटेडको ठगी प्रकरणमा फरार रहेकी ऋण उपसमिति सदस्य तथा कर्मचारी अस्मिता भण्डारीलाई प्रहरीले पक्राउ गरेको छ।
जिल्ला प्रहरी कार्यालय सुनसरीले जारी गरेको प्रेस विज्ञप्तिअनुसार धरान–१५ निवासी ३३ वर्षीया अस्मिता भण्डारी पक्राउ परेकी हुन्। उनी बराह सहकारीको ऋण उपसमिति सदस्य, ग्राहक सेवा (कस्टमर केयर) कर्मचारी तथा बराह ग्रुप नम्बर १ को प्रदेश सचिवालय सदस्य रहेको प्रहरीले जनाएको छ।
सहकारी ठगी, संगठित अपराध तथा सम्पत्ति शुद्धीकरणसम्बन्धी कसुरमा फरार रहेकी भण्डारीलाई खोजतलासका क्रममा कोशी प्रदेश प्रहरी कार्यालय विराटनगर र जिल्ला प्रहरी कार्यालय सुनसरीबाट संयुक्त रूपमा खटिएको विशेष टोलीले पक्राउ गरेको हो।

बराह सहकारीको मुख्य कार्यालय धरानमा रहेको र सहकारीसँग आबद्ध नेपालभर ३० वटा तथा विदेशमा चारवटा कम्पनी स्थापना गरी विभिन्न मितिमा बचतकर्ताको रकम अपचलन तथा ठगी गरेको आरोप छ।
उक्त प्रकरणमा शंकर थापासमेत ४ हजार २४३ जना पीडितको जाहेरीका आधारमा नेपाल सरकार वादी रहेको मुद्दामा कुल बिगो १० अर्ब ७३ करोड ४३ लाख ४७ हजार ९१३ रुपैयाँ कायम गरिएको प्रहरीले जनाएको छ।
सोही प्रकरणमा सहकारीका संस्थापक अध्यक्ष शिवकुमार बिश्वकर्मा पनि पक्राउ परेका छन्। पछिल्लो पक्राउसँगै बराह सहकारी ठगी प्रकरणमा फरार प्रतिवादीमाथिको अनुसन्धानलाई प्रहरीले थप अघि बढाएको प्रहरी कार्यालय सुनसरीका सूचना अधिकारी डीएसपी चन्द्रबहादुर खड्काले जानकारी दिए ।




















