मुक्तक

१
धर्तीको सुन्दर परिधान हो नारी
ममताको अटुट मुहान हो नारी
परागसेचनको ब्याड मात्र होइन
सृष्टिकै उज्यालो बिहान हो नारी

२
सर्वाेच्च शिखरमा पहिलो पाइला टेक्ने नेपाली
विश्वभर नै वीरताको इतिहास लेख्ने नेपाली
धर्तीको जिँउदो ईश्वरलाई किन पुज्दैन आज
गल्लीका हरेक ढुङ्गालाई देउता देख्ने नेपाली

३
न्यानो स्नेहिल ममताको सुमधुर सङ्गीत हो आमा
ब्रम्हाजीको आँगन भर्ने सुन्दर रक्तरञ्जित हो आमा
पगाली आफ्नै छातीको पर्वत अमृत धारा पिलाउन
प्रसवपीडाले कति हार नमान्ने अन्तिम जीत हो आमा ।

४

अहिंसाका सुन्दर काव्यहरूमा सदा उच्च तिमी छौ
प्रेम र करूणाले बनेको शान्तिको अग्रदूत तिमी हौ
तिम्रो प्रवेश दिलमा भए झलमल हुन्छ चित्त जनको
उद्दीप्त ज्ञान प्रकाशपुञ्जको मुहान जो बुद्ध तिमी हौ ।

५
पौरखी हातहरू यही माटोमा खसाउन पाए
धर्तीको माटो हाम्रै पसिनाले रसाउन पाए
समृद्ध बन्थ्यो होला देश परदेशिने मनहरू
स्वदेशी घर आँगन वरीपरी बसाउन पाए

६
सुखदुःखले बयली खेल्ने आँगन हो नारी
सुखेनी जमिन रसिलो पार्ने सावन हो नारी
कलुषित उछ्वास फाल्ने रछ्यान होइन
कञ्चन पहाडी झरनाको पावन हो नारी ।