इटहरीः पूर्व एमाले र पूर्व माओवादी केन्द्र मिलेर नेकपा बन्यो । नेकपाका जिल्ला, प्रदेश देखी केन्द्रीय कमिटीहरू बनेका छन् । जिल्ला, प्रदेश र केन्द्रका जम्बो कमिटीमा नेताहरू सेटल भएका छन् । उनीहरू सेटल भएर पार्टी काममा सक्रिय छन् ।
नेकपामा जिम्मेवारविहीन पूर्व एमालेका सुनसरी सचिव र नेपाल यातायात स्वतन्त्र मजदुर सङ्गठनका पूर्व केन्द्रीय अध्यक्ष समेत भएका धरानका मोतिराज सुनुवार भने पत्रिका बाढ्छन । धरानको औजार प्रकाशन सहकारी संस्थाबाट प्रकाशित हुने औजार दैनिक बाढ्न धरानका चोकचोक गल्लीगल्ली पुग्छन् सुनुवार ।
भन्छन्, ‘म धरानका विभिन्न वडाका १५ सय घरमा पत्रिका बोकेर पुर्याउछु ।’ आफै अध्यक्ष भएको प्रकाशनको पत्रिका बाढ्दा आफूलाई गौरवबोध हुने सुनुवार बताउँछन् । स्थानियबासीसग दैनिक संवाद हुने, शारीरिक कसरत हुने र श्रम गर्ने बानी बस्ने भएकोले आफै पत्रिका बाढ्ने सुनुवार बताउँछन् ।
पार्टीमा जिम्मेवारविहिन भएपछि पत्रिका बाढेको हो भन्ने प्रश्नमा सुनुवार भन्छन्, ‘पार्टीको सक्रिय जिम्मेवारीमा हुँदा दैनिक पत्रिका बाढ्न फुर्सत नहुन सक्छ । अहिले फुर्सत भएकोले पत्रिका बाढ्न सक्रिय छु ।’
५५ बर्से सुनुवारलाई परिवार देखी प्रकाशनगृहका सबैले पत्रिका बाढ्ने बाहेकका काम गर्न भनेपनि बाढ्ने गरेको औजार दैनिकका प्रबन्ध निर्देशक दामोदर गुरगाँई बताउँछन् । उनी भन्छन्, ‘यातायात मजदुर, यातायात मजदुर नेता हुँदै जिल्ला पार्टी नेता हुनुभएको मोति सरमा श्रमगरौँ भन्ने भावनाले यो पत्रिका बाढ्ने कुरामा आत्मसन्तुष्टि भएको हुनुपर्छ ।’
विशेष बिराम र पारिवारिक व्यस्तता बाहेक सबै समय सुनुवारले पत्रिका बाढ्ने बताउँछन् प्रबन्ध निर्देशक गुरगाई वैशाख देखी निरन्तर पत्रिका बाढिरहेको बताउँछन् ।
पूर्व पञ्चलाई टिकट दिएको विरोध गरेपछि सुनुवार जिम्मेवारीबाट माइनस
२०७० सालमा भएको दोस्रो संविधानसभाको चुनावमा धरानबाट प्रत्यक्ष निर्वाचित सांसदको दाबा गरेका थिए सुनुवारले । धरानबाट सुनसरी पार्टीमा पदाधिकारी हुने एक्ला नेता र धरानमा पञ्चायत कालदेखि सक्रिय नेता भएकोले उमेद्वारमा दाबा गरेका थिए सुनुवारले । तर, टिकट पाए पंचायतकालमा पूर्व राज्य मन्त्री समेत भएका कृष्णकुमार राईले ।
कुनै बेला आफ्नै पार्टी दबाउने राजनीतिक पक्षधरका हर्ताकर्तालाई पार्टीले धरान जस्तो लालकिल्लाबाट टिकट दिएपछि सुनुवार असनतुष्ट बने । २०७० कार्त्तिक ११ गते भने उनको पञ्चायत काल देखिको पूर्व एमालेसँगको सम्बन्ध तोडे ।
उनले ११ गते धरानको होटेल एम्बासडरमा पत्रकार सम्मेलन गरेर पार्टीबाट अलग भएको बताए । तत्कालीन पार्टी नेतृत्वले दोस्रो संविधानसभाको चुनावमा प्रत्यक्ष र समानुपातिक दुवैमा आफूलाई जानाजान माइनस गरेको बुझेर सुनुवारले पार्टीबाट अलग हुने निर्णय गरेको तत्कालीन पत्रकार सम्मेलनमा बताएका थिए । सुनुवार अलग भएको १० दिन पछि पार्टीका लालबाबु पण्डित लगायतका शीर्ष नेताहरूले सम्झाएर पुनः पार्टीमा ल्याएका थिए ।
एमाले सुनसरी सचिव हुँदा पार्टीबाट अलग भएका सुनुवारलाई पार्टीले पुनः आएपछि भने जिम्मेवार दिएन । गत स्थानीय चुनाव अगाडि भने कोसी अञ्चल सल्लाहकार बनाइएका थिए सुनुवार । स्थानीय चुनाव, प्रदेश तथा सङ्घको चुनाव सकियो । नेकपा बन्यो । तर, सुनुवारले जिम्मेवारी पाएका छैनन् ।
‘पार्टीमा कुनै साइनो नभएकाहरू पनि पछि जोडिएर आउँदा जिम्मेवारी पाएका छन् तर म जीवन नै पार्टीलाई दिएपनि दश दिने खटपट्टिकै कारण जिम्मेवारीबिहिन छु’, सुनुवार भन्छन्, ‘यसमा मलाइ धेरै गुनासो छैन पार्टी र नेताहरूले केही न केही त सोचेकै होलान् ।’
_1720278409.jpg)
