इटहरीः नेपाल कम्युनिष्ट पार्टी (नेकपा) इटहरी नगर कमिटी गठन भएको १ महिना पनि पूरा हुन नपाउँदै भाँडभैलो शुरु भएको छ ।

लामो समयदेखि पार्टीमा योगदान पु¥याएका नेता कार्यकर्तालाई उपेक्षा गरिएको भन्दै असन्तुष्टि चुलिएको हो । त्यसको मुख्य कारकको रूपमा नवगठित नगर सचिव काशीनाथ दंगाल रहेका छन् ।

नेकपाभित्र उनको अस्वाभाविक पदोन्नतिले इटहरी नेकपामा हलचल मच्चिएको हो । त्योभन्दा बढी उनको व्यवहारको कारण नेकपा इटहरीभित्र ध्रुवीकरण बढिरहेको छ । केही दिन अघि सम्पन्न जनता बहुमुखी क्याम्पसको व्यवस्थापन समितिको निर्वाचनमा नेकपाभित्रको विवाद छताछुल्ल भयो ।

साउन १४ गतेको लागि तोकिएको निर्वाचनमा सर्वसम्मत समिति गठन गर्ने सर्वदलीय निर्णय भयो । नेकपा, नेपाली काङ्ग्रेस, राप्रपा र समाजवादी पार्टी नेपालबीच भद्र सहमति भयो । जसमा नेकपाको तर्फबाट उनै दंगालले वार्तासमितिको नेतृत्व गरेका थिए ।

नेकपाले अध्यक्ष चाहेमा दिन सकिनेमा अन्य दल राजी थिए । तर उनै दंगालले अध्यक्ष काङ्ग्रेसलाई लिन आग्रह गर्दै आफूहरू उपाध्यक्षमा चित्त बुझाउने गरी सहमति जनाए । त्यसपछि सर्वदलीय प्यानल तयार भयो । नेपाली काङ्ग्रेसले अध्यक्ष पाउने गरी भएको सहमतिप्रति नेकपाको अर्को खेमाले असन्तुष्टि जनायो । जसको नेतृत्व नेकपाका नेता रेवतीरमण भण्डारीले गरेका थिए । पूर्व संविधानसभा सदस्य समेत रहेका भण्डारी पार्टीले जिम्वेवारी दिए आफू अध्यक्ष हुने दाउमा थिए ।

भण्डारीकै भनाइ अनुसार केही समय अगाडि नेकपाको तर्फबाट जनता क्याम्पसको अध्यक्ष उनी बन्ने सहमति भएको थियो । तर आफू अध्यक्ष बन्ने भएपछि अर्काथरी नेता आफूलाई रोक्न लागिपरेको उनको बुझाइ थियो ।

दंगाल नेतृत्वको वार्ता समितिले साउन ८ गते नै काङ्ग्रेसलाई अध्यक्ष दिने सहमति गरिसकेको थियो । त्यसको विरुद्धमा भण्डारीले छुट्टै उम्मेद्वारी घोषणा गर्ने बताए । त्यसपछि पुन नेकपाको आन्तरिक बैठक बस्यो । जसले भण्डारीलाई अध्यक्ष मानेर जाने सहमति ग¥यो ।

भण्डारीलाई अध्यक्ष बनाउनैपर्ने लबिङमा प्रदेश १ का सांसद समेत रहेका अर्का नेता लीलम बस्नेत लागिपरे । उनले आफैँ निजी कार्यकक्षमा छलफल राखेर कुनै पनि हालतमा भण्डारीलाई अध्यक्ष बनाउन दबाब सिर्जना गरे ।

त्यसले नेकपाभित्रको समीकरण नै परिवर्तन गरिदियो । उनै बस्नेतले नेपाली काङ्ग्रेसलाई पनि भण्डारीलाई अध्यक्ष स्वीकार्ने वातावरण बनाए । त्यसपछि नेपाली काङ्ग्रेसको तर्फबाट अध्यक्ष बन्न लागेका विश्वप्रसाद रिजालले उम्मेद्वारी नदिने बताउँदै काङ्ग्रेसले पनि भण्डारीलाई स्वीकार गरेको घोषणा गर्यो ।

पार्टीको आधिकारिक टोलीले गरेको निर्णयको विरुद्धमा लागेको भन्दै दंगालले भण्डारीलाई कारबाही गर्ने चेतावनी दिए । त्यसपछि झनै धु्रवीकरण बढ्यो । पार्टी बैठकमै उनले दिएको धम्कीका कारण भण्डारी पक्षका नेता कार्यकता रुष्ट देखिन थाले ।

दंगाल नेकपा प्रदेश १ कमिटीका इन्चार्ज भीम आचार्य निकट मानिन्छन् भने भण्डारी र आचार्य एकअर्काका विरोधी हुन् । दंगाल उनै आचार्यको निर्देशनमा भण्डारीलाई रोक्न लागिपरेका थिए । स्थानीय नेता र कार्यकर्ताको समर्थन पाएका भण्डारी अन्ततः सञ्चालक समितिमा निर्वाचित भए । सर्वदलीय सहमति कार्यान्वयन भए उनी अध्यक्ष हुने पक्का भइसकेको छ । नेकपाले सञ्चालक समितिको नेतृत्व गर्ने मौका त पायो । तर पछिल्ला गतिविधिले नेकपा इटहरी तहसनहस बन्दै गइरहेको छ ।

२ वर्षको अन्तरालमा दंगालको वडा कमिटी मनोनित सदस्यदेखि नगर सचिवसम्मको यात्रालाई लिएर स्थानीय नेता रुष्ट देखिन्छन् । २०७४ सालमा तत्कालीन नेकपा एमालेको वडा नम्बर ५ को वडा सदस्य रहेका उनी १ वर्षको अन्तरालमा नगर कमिटीको सचिवालय सदस्यमा मनोनित भए । भीम आचार्यसँगको पारिवारिक साइनो पनि उनको राजनीतिक उन्नयनको मुख्य कारक हो ।

वडा कमिटीमा उनी सदस्य हुँदा अध्यक्ष रहेका वीरेन्द्र गौतम अहिले पदविहीन छन् । तर दंगाल भने जनता माध्यमिक विद्यालयको सञ्चालक समिति अध्यक्ष र नेकपा नगर कमिटी सदस्य छन् । आचार्यजस्तो शक्तिशाली नेताको साथ पाए पनि स्थानीय कार्यकर्ता भने उनीसँग रुष्ट छन् ।

अहिले उनी आचार्यको गुट स्थापित गराउन लागिपरेको नेकपाका नेता बताउँछन् । तर भण्डारीको पक्षमा प्रदेश सांसद बस्नेत लगायत अन्य नेता कार्यकर्ताको साथ छ । हाल नेकपा इटहरीमा पूर्व माओवादी केन्द्रका बहादुर सिंह तामाङ अध्यक्ष छन् । तर उनी पनि कम विवादित छैनन् ।

नेकपाका कार्यकर्ता भए पनि जनता क्याम्पसको सञ्चालकमा स्वतन्त्र उम्मेद्वारी दिएका हेमसागर तिम्सिनाको पक्षमा फेसबुक प्रचारको विषयमा आफ्नै कार्यकर्ता मिलन बास्तोलालाई स्पष्टीकरण सोधेपछि उनी विवादित बने । उनको विरुद्धमा युवा परिचालीत भए ।

हाल नेकपाभित्र अध्यक्ष र सचिवको कार्यशैलीलाई लिएर पूर्व एमाले र पूर्व माओवादी केन्द्र सम्बद्ध युवाको छुट्टै टिम बन्दै गएको छ । जसको नेतृत्व पूर्व माकेका युवा नेता मदन चुडालले गरिरहेका छन् । हालको नेतृत्वले अब पनि यो माहोललाई मत्थर पार्ने कोशिस नगरे असामान्य अवस्था आउन सक्ने नेताहरूको बुझाइ छ ।