महालक्ष्मी; धनकुटाः गाउँगाउँका जनतालाई नगरपालिकाको केन्द्रसँग जोड्नका लागि धनकुटाको महालक्ष्मी नगरपालिकाले गौरवका योजना बनाई सडक बिस्तारलाई तीव्रता दिएको छ । महालक्ष्मी नगरपालिकाको केन्द्र जीतपुर बजार प्रवेशका लागि माकुराको जालोझैँ चारैतिरबाट सडक विस्तारको कामलाई तीव्रता दिइएको हो ।
नगरपालिकाले नियम बनाएर ठूला सडक १४ मिटर, मध्यम खालका १० मिटर र ट्रयाक खोलेका सडकहरूको ६ मिटर चौडाइ कायम गरी सडक विस्तारको कार्यलाई तीव्रता दिइएको महालक्ष्मी नगरपालिकाका मेयर पर्शुराम नेपालले बताए । राज्यको पुनर्संरचना हुनुअघि अर्थात् महालक्ष्मी नगरपालिका बन्नुअघिका साबिकका गाविसहरूको केन्द्रका रूपमा जिल्ला सदरमुकाम धनकुटा रहेको र पुनसंरचनापछि ती ६ गाविस गाभिएर महालक्ष्मी नगरपालिका निर्माण भएपछि त्यसको केन्द्र जीतपुर बजार बनेकाले केन्द्रमा सबै वडाका जनतालाई जोड्नका लागि सडक विस्तारलाई तीव्रता दिइएको हो ।
नगरपालिकाको पूर्वी सिमाना, तेह्रथुम जिल्ला, पश्चिम भोजपुर जिल्ला, उत्तर सङ्खुवासभा जिल्ला तथा दक्षिण पाख्रीबास नगरपालिका र छथर गाउँपालिका रहेका छन् । ती सबैतिरबाट नगरपालिकाको केन्द्र जीतपुर बजारलाई जोड्नका लागि चारैतिरबाट सडक निर्माणको कार्य थालिएको छ । नगरपालिकाका ९ वडाका गाउँगाउँमा स्थानीय किसानहरूले उत्पादन गरेका कृषिजन्य सामग्री र दुग्धजन्य वस्तुलाई सहज तरिकाले केन्द्रको बजारसम्म ल्याएर बिक्री गर्न सहज बनाउनुपर्ने योजना अनुसार नगरपालिकाले गौरवका आयोजना भनेरै नगरसभाबाट पारित गरी सडक निर्माणको कार्यलाई पहिलो प्राथमिकतामा राखेको मेयर नेपालले बताए ।
नगरपालिकाले गौरवको योजना अनुसार महालक्ष्मी चक्रपथ नामकरण गरेर नगरपालिकाको केन्द्रलाई जोड्दैछ । नगरपालिकाले छथर जोरपाटीबाट सिँधुवा हँुदै वैकल्पिक सडकका रूपमा त्रिशुलेसम्मकोे २२ किलोमिटर सडक निर्माणको काम थालेको जनाएको छ । पाख्रीबास नगरपालिकाबाट जीतपुर सिधै आउने गरी चित्रेबजारबाट आउने सडक निर्माण काम थालिएको छ । ती स्थानमा दुई ओटा सडक निर्माणको योजना अनुसार ट्रयाक खोलिसकिएको छ । त्यस्तै, खाप्राङ, मूर्तिढुङ्गा हँुदै जीतपुरसम्मको सडकमा पनि ट्रयाक खोल्ने काम सकिएको छ ।
अर्कोतर्फ दारेगौँडा–चित्रे र वसन्तपुरको बीचबाट जीतपुर जोड्ने सडकको ट्रयाक खोली ग्राभेल गरिसकिएको महालक्ष्मी नगरपालिकाका मेयर नेपालले बताए ।
अरुण नदीको किनारमा लेगुवा खोलाको किनारबाट महालक्ष्मी नगरपालिकाको केन्द्र जीतपुरलाई जोड्ने सडक निर्माण कार्य पनि नगरपालिकाले थालेको छ । त्यसैगरी डाँडागाउँ हुँदै चानुवा प्रवेश गर्ने गरी मुढेशनिश्चरेबाट खनिएको सडकको स्तरोन्नति गर्ने काम पनि नगरपालिकाले गरेको छ । सो सडक चाँडै कालोपत्रे हुने क्रममा छ ।
चालु आर्थिक वर्षमा सोही सडकको थप १० किलोमिटर कालोपत्रे गर्ने योजना अनुसार आवश्यक प्रक्रिया अघि बढाइएको छ । सो सडकबाट पनि जीतपुर प्रवेश गर्न सकिने मेयर नेपालले बताए ।
त्यस्तै, रामबजार (लेगुवा)बाट जीतपुर जोड्ने गरी ९ मिटरको वैकल्पिक राजमार्ग बनाउने योजना नगरपालिकाले अघि सारेको छ । सो योजनाअनुसार हाल सो क्षेत्रमा कतै कटिङ, कतै सोलिङ र कतै ग्राभेलको काम भइरहेको मेयर नेपालले बताए । त्यहीँबाट अर्को सडक पनि विस्तार गरी जीतपुरलाई जोड्नका लागि आवश्यक कार्य थालिएको मेयर नेपालले जनाए ।
महालक्ष्मी नगरपालिकाको सिमानामा पाख्रीबास नगरपालिका पर्छ । लेगुवाको सिम्ले भन्ने स्थानबाट अर्को ट्रयाक खोलिएको छ । मूर्तिढुङ्गाको आहाले तथा निगुरेटार हुँदै डाँडागाउँ जोडिने बाटो पनि ग्राभेल गरिएको छ ।
जीतपुर, मजेपु हुँदै डाँडागाउँ पु¥याउने गरी ट्रयाक खोलिसकिएको छ । त्यस्तै, कटहरे जीतपुर, ढोडे, चानुवा जोड्दै धर्मदेवीसम्मको सडक ग्राभेल गर्ने योजनाका साथा टेण्डर आह्वान गरिसकिएको मेयर नेपालले बताए । अन्य बस्तीहरूमा पनि जनताका आवश्यकता र मागका आधारमा सो स्थानमा ट्रयाक खोल्ने काम पनि नगरपालिकाले गरिसकेको मेयर नेपालले बताए ।
चालु आर्थिक वर्षदेखि सडकका लागि नयाँ ट्रयाक खोल्ने काम बन्द गरिएको मेयर नेपालले बताए । चालु आर्थिक वर्षदेखि नगरपालिका, प्रदेश सरकार, सङ्घीय सरकार, एशियाली विकास बैंक र सांसदहरूको कोषबाट प्राप्त बजेटबाट सडक कालोपत्रे तथा स्तरोन्नतिको कार्य अघि बढाइने मेयर नेपालले बताए । मेयर नेपालका अनुसार गत आर्थिक वर्षमा उन्नति परियोजनाको सहकार्यमा ६३ किलोमिटर सडक ग्राभेलको काम सकिएको छ ।
चालु आर्थिक वर्षमा चानुवा जाने सडक कालोपत्रे हुने र त्यसका लागि टेण्डर आह्वान भएको मेयर नेपालले बताए । त्रिशुले जीतपुर हुँदै रामबजारसम्म जाने ३३ किलोमिटर सडक कालोपत्रेका लागि एशियाली विकास बैंक प्रस्ताव पेश गरिएको महालक्ष्मी नगरपालिकाका निमित्त कार्यकारी अधिकृत खगेन्द्र नेपालले बताए ।
अर्को नगरपालिका केन्द्रसम्म आइपुग्ने सडक निर्माणको योजना छ । सो सडकलाई पनि सङ्घीय सरकारको नीतिअनुसार नगरपालिकासम्म आउने सडक कालोपत्रे गर्ने भन्ने योजनाअनुसार सोही अनुसार कालोपत्रेका लागि सङ्घीय सरकार र दातृ निकायसँग प्रस्ताव पेश गर्ने काम नगरपालिकाले गरेको छ ।
एउटा सडक बिग्रिँदा अर्कोलाई वैकल्पिक सडकका रूपमा प्रयोग गर्न सकिने भएकाले महालक्ष्मी नगरपालिकाले चारैतिरबाट नगरपालिकाको केन्द्र जीतपुरलाई जोड्ने गरी सडक निर्माण योजना अनुसार काम गरिरहेको मेयर नेपालले बताए ।
‘विगतका दिनहरूमा १०÷१५ किलोमिटर सडक बिग्रँदा जिल्ला सदरमुकाम धनकुटाको प्रवेशद्वार नै बन्द भएको घटनाबाट पाठ सिक्दै महालक्ष्मी नगरपालिकाले गौरवका योजनाका रूपमा माकुराको जालो झैँ सडक विस्तार तथा निर्माणलाई विशेष प्राथमिकतामा राखेको हो ।’
_1720278409.jpg)
