विराटनगरः अमेरिकी समय अनुसार मङ्गलबार दिउँसो ३ बजे अमेरिकाको मिजौरी राज्यमा भएको कार दुर्घटनामा मोरङको विराटनगरका एकै परिवारका ३ जनाको ज्यान गएको छ ।

विराटनगरको सोमबारे घर श्रद्धा खनाल र उनका बाबुआमा गोविन्द खनाल र शान्ता खनालको ज्यान गएको हो । २ ओटा कार एक आपसमा ठोक्किएर भएको सो दुर्घटनामा श्रद्धाका श्रीमान् र छोरा घाइते भएका छन् । सो कार श्रद्धाका श्रीमान् प्रभास ओझाले चलाएका थिए । प्रभास र  ४ वर्षीय छोराको गम्भीर अवस्थामा उपचार भइरहेको बताइएको छ ।

रोकिरहेको अवस्थामा अर्काे कारले पछाडिबाट ठक्कर दिएर दुर्घटना भएको बताइएको छ । ठक्कर दिने कार चालकको बारेमा प्रहरीले सार्वजनिक नगरेको बताइएको छ ।