इटहरीः धुलिखेल अस्पतालमा उपचाररत् २९ वर्षीया सुत्केरी महिलाको कोरोनाका कारण मृत्यु भएको स्वास्थ्य मन्त्रालयले पुष्टि गरेको छ । केही बेरअघि मन्त्रालयका तर्फबाट डा.समिरकुमार अधिकारीले एक प्रेश विज्ञप्ती प्रकाशित गरि उनको कोरोना संक्रमणकै कारण मृत्यु भएको पुष्टि गरेका हु्न् । उनको मृत्युलाई कोभिड १९ बाट मृत्यु हुने नेपालको पहिलो नागरिक भएको मन्त्रालयले जनाएको छ ।
कोरोना संक्रमणको शंकामा उनको स्वाब परीक्षणका लागि राष्ट्रिय जनस्वास्थ्य प्रयोगशाला टेकु पठाइएकोमा ‘रिपोर्ट पोजिटिभ’ आएको स्वास्थ्य मन्त्रालयले जनाएको छ । गत वैशाख २३ गते महाराजगन्जस्थित त्रिवि शिक्षण अस्पतालमा भर्ना भएकी महिला २४ गते सुत्केरी भएकी थिइन् । २५ गते अस्पतालबाट ‘डिस्चार्ज’ भएर सिधुपाल्चोक घर गएकी उनमा ज्वरो र श्वासप्रश्वासमा समस्या देखिएको थियो । स्वास्थ्यमा जटिल समस्या भएपश्चात् धुलिखेल अस्पताल भर्ना भएकी उनको गएको बिहीबार मृत्यु भएको अस्पतालले जनाएको छ । उनको स्वाब धुलिखेल अस्पतालमा ‘पीसीआर’ परीक्षण गर्दा पनि कोरोना पोजिटिभ देखिएको थियो ।सुत्केरी महिलाको मृत्यु भएपछि धुलिखेल अस्पतालले आकस्मिककक्ष ‘सिल’ गरेको छ । महिलाको सम्पर्कमा आएका छजना व्यक्तिहरुलाई ‘आइसोलेसन’कक्षमा राखिएको छ ।
यसैबीच थप २ जनामा कोरोना संक्रमण पुष्टि भएको छ । योसंगै नेपालमा कोरोना संक्रमित हुनेको संख्या २८१ जना पुगको छ । उनिहरु धनुषा निवासी २० र ६५ बषीय पुरुष छन् । उनिहरुको स्वास्थ्य अवस्था सामान्य रहेको मन्त्रालयले जनाएको छ । उनिहरु स्वास्थ्यकर्मीहरुको सम्पर्कमा रहेको बताइएको छ ।
_1720278409.jpg)
