इटहरीः नेपालमा हालसम्मकै सबै भन्दा बढी संख्यामा कोरोना संक्रमितहरु पछिल्लो २४ घण्टाको अवधिमा फेला परेका छन् । देशका विभिन्न स्थानमा संचालित प्रयोगशालामा गरिएको पिसिआर परीक्षणमा ६७१ जना संक्रमित फेला परेका हुन् । योसंगै नेपालमा कुल संक्रमितको संख्या ७ हजार ८४८ पुगेको छ। स्वास्थ्य तथा जनसंख्या मन्त्रालयले कोरोना अपडेटबारे नियमित प्रेस ब्रिफिङमा आज यस्तो जानकारी दिएको हो। मन्त्रालयका प्रवक्ता डाक्टर जागेश्वर गौतमले दिएको जानकारीअनुसार पछिल्लो २४ घण्टामा भेटिएका संक्रमितमा ५९१ जना पुरुष र ८० जना महिला रहेका छन्।

मन्त्रालयका अनुसार डिस्चार्ज हुनेको संख्या ११ सय ८६ पुगेको छ। जसमा ११४ जना महिला र १०७२ रहेका छन्। हालसम्म पीसीआर विधिबाट १ लाख ५५ हजार ५ सय १८ र पछिल्लो २४ घण्टामा ५ हजार ७ सय ४६ जनाको नमुना परीक्षण भएको छ। यस्तै आरडिटी विधिबाट २ लाख ४३ हजार ७५ र पछिल्लो २४ घण्टामा ९ हजार ५ सय ३२ जनाको परीक्षण भएको छ।

देशभरीका क्वारेन्टाइनमा १ लाख १६ हजार २ सय १५ जना रहेका छन्। यस्तै ६ हजार ६ सय ४८ जना संक्रमित विभिन्न अस्पतालका आइसोलेसनमा उपचाररत रहेका छन्। अहिलेसम्म १ हजार १ सय ८६ जना संक्रमति उपचारपछि निको भएर घर फर्किएका छन्। पछिल्लो २४ घण्टामा १९ जना डिस्चार्ज भएका छन्। नेपालमा हालसम्म २२ जनाले कोरोना संक्रमणका कारण ज्यान गुमाईसकेका छन् ।