इटहरी:सुनसरीको इटहरीमा शुक्रवार एक जना वृद्ध बसमै लुटिएका छन् । धरान ८ सिद्धकाली चौकका ५७ वर्षीय डम्बर प्रसाद बास्तोला इटहरीको पूर्वी बस स्टेनमा तीन जनाको समूहबाट साथमा रहेको एक लाख रुपैयाँ नगद लुटिएका हुन् ।

कवाडी व्यवसायी उनी सामान खरिद र कर्मचारीलाई तलब दिन इटहरी आएका थिए ।

लुटिएका बास्तोलाका अनुसार शुक्रवार दिउसो २ बजे आफू बस स्टेनमा ओर्लिन लाग्दा बस भित्रै तीन जनाको समूहले लुटपाट गरेको बताए ।

‘दुई वटा गोजीमा पैसा राखेको थिए, उनीहरू इटहरीकै हलगडाबाट बसमा चढेका थिए । म बसेको सिट नजिकै उनीहरू बसे । बस पूर्वी स्टेन पुगेपछि म ओर्लिने क्रममा बस भित्रै उनीहरूले मलाई जबरजस्ती लुटे ।’ पछि मलाई बसबाट धकेल्दिएर झार्दिए ।

सोही बसमा भागेका उनीहरूलाई एक जना मोटरसाइकल चालक मार्फत बसलाई बुढी खोलाको पुलमा छेकेर रोकेपछि लुटपाट गर्ने मध्ये एक जना बसमा हाम फालेर भागेको उनले जानकारी दिए । पछि लखेट्दै स्थानीयको सहयोगबाट पुलदेखि एक किलोमिटर परबाट पक्राउ गरी प्रहरीलाई बुझाएको हो ।

सोही मौकामा बाँकी दुई जना भने फरार भएको उनको भनाई छ ।

पक्राउ परेका एक जना लुटेरा भने पश्चिम धादिङ ठेगाना भएको बताइएको छ । यता इलाका प्रहरी कार्यालय इटहरीले पक्राउ परेकासँग अन्य दुईको विवरण निकाली खोजतलासमा जुटेको छ ।