इटहरी: वर्षेनी आउने एसईईको परीक्षाको रिजल्ट आएपछि विद्यार्थीलाई त्यसपछिको यात्रा छान्न समस्या पर्छ । राम्रा कलेजहरु थुप्रै छन् सबैले राम्रैमा पढ्न सक्छन् भन्ने पनि होइन । तर कम्तीमा आफ्नो क्षेत्रमा चलेको उच्च शिक्षा प्रदान गर्ने शिक्षालय छ भने सोही संकाय पढ्न टाढा किन भौतारिने भन्नेचाहिँ अवश्य हो ।
रामधुनी नगरपालिकाको झुम्कामा रहेको युनिक एकेडेमी उच्च शिक्षा अर्थात् दश जोड दुई पढाउने झुम्काका शिक्षालयहरुमा पहिले लाइसेन्स पाएको शिक्षालय पनि हो । हुन त शिक्षालयहरुको काम जनशक्ति निर्माण गर्ने हो । आफूले उत्पादन गरेका जनशक्तिहरु कहाँ कहाँ पुगिसक्छन् तर शिक्षालयहरु त्यहीँ रहन्छन् । होला, केही भौतिक प्रगति त हुन्छ नै । तर त्यसबाहेक केही फरक हुँदैन । यो निरन्तरको प्रक्रिया नै हो । युनिकले उत्पादन गरेका थुप्रै जनशक्तिहरु कोही डाक्टर बनेका छन्, कोही इन्जिनियर । कोही युरोपतिर छन् त कोही संयुक्त राज्य अमेरिका अनि कोही उच्च गुणस्तरको व्यावसायिक जीवन पनि बाँचिरहेका छन् । त्यो युनिकका लागि गर्वको विषय हो र रहिरहनेछ ।
युनिक पनि कुनै समय ठूलो ट्र्याजडीबाट आएको सँस्था हो । कुनै बेला झुम्कामा कक्षा ५ भन्दा माथि पढाउने शैक्षिक सँस्थाहरु थिएनन् । इटहरी जानुपर्ने बाध्यता थियो । तत्कालीन भासी गाविसमा सञ्चालन भएका मुनलाइट र ब्रिलियन्ट नामका बोर्डिङ्ग स्कुलहरु मिलेर माध्यमिक शिक्षा चलाउने भन्ने निर्णय गरेका थिए । युनिक एकेडेमीको नामबाट सञ्चालन भएको उक्त मुनलाइट र युनिकमा एउटाले प्रावि र अर्कोले मावि चलाउने भए । मुनलाइटबाट चल्दै गर्दा झुम्कामा एउटा ठूलो दुर्घटना भयो । विद्यालय आउँदै गरेको टेम्पो दुर्घटना हुँदा मुनलाइटका १३ जना विद्यार्थीहरु सुनसरी मोरङ्ग सिँचाइ आयोजनाको नहरमा परे । घटनाले सारालाई स्तब्ध बनायो । विद्यालय त झण्डै डेढ महिना सञ्चालन हुनै सकेन । मानवीय क्षति, मानसिक तनाव र आर्थिक नोक्सानीका कारण त्यो एउटा घटनापछि विद्यालयलाई उठ्न झण्डै तीन वर्ष लागेको युनिक एकेडेमीका सँस्थापक प्रिन्सिपल उमेश थापा बताउँछन् ।
हरेक दुर्घटना तथा ट्र्याजडीले मान्छेलाई थप सिकाउँदै लैजान्छ, थप मजबुत बनाउँदै लान्छ । त्यो दुर्घटनापछि युनिकलाई हरेक कुरामा सावधानी अपनाउन प्रेरणा समयले दिँदै लगेको छ । २ जनाको लगानीबाट सञ्चालन भएको युनिक २०६७ सालबाट ६ जनाको लगानीमा सञ्चालन भइरहेको छ । ‘युनिकलाई ‘युनिक’ नै बनाइराख्न थुप्रै मेहनत परेको छ । ‘ठाउँ परिवेश र अभिभावकको स्तरलाई हेरेर सबैलाई समेट्नेगरी युनिकले आफ्नो साखलाई अहिले पनि जोगाइराखेको छ ।’ प्रधानाध्यापक उमेश थापाले हामीलाई सुनाए । रामधुनी तथा झुम्काका विद्यार्थीले व्यवस्थापन तथा कम्प्युटर साइन्स नै अध्ययन गर्नको लागि इटहरी तथा अन्य शहरमा धाइरहनु पर्दैन भन्ने हिसाबले आफूहरुले अध्यापन गर्ने गरेको थापा बताउँछन् । ‘हामी फाउण्डरहरु आफैँ पनि क्लास लिन्छौँ । हरेक परीक्षामा उत्कृष्ट प्रतिफल ल्याइराखेका छौँ । विद्यार्थीलाई आफँैले निगरानीमा राखेका छौँ । त्यसैले पनि हामी युनिक छौँ ।’ थापा थप्छन् ।
आफूहरुले मेहनत गरेर एसएलसीमा राम्रो रिजल्ट ल्याउने तर एसएलसीपछि पढ्न अनिवार्य रुपमा बाहिरै जानुपर्ने भएपछि २०६८ सालतिर युनिकले दश जोड २ अर्थात टेन प्लस टु को अवधारणा ल्याएको रहेछ । प्लस टु कलेज लेभल नभई माविकै एउटा तह भएको हुँदा त्यसको लागि बिहानै उठ्नुपर्ने, लामो यात्रा गर्नुपर्ने भएकाले पनि इटहरी लगायतका ठाउँमा प्लस टु कै लागि जानुपर्ने आवश्यकता नरहेको युनिक एकेडेमीका सँस्थापक प्रधानाध्यापक थापा बताउँछन् । शुल्कको हिसाबले अन्यत्र गएर ११ मात्र पढ्न सक्ने खर्चले झुम्कामा ११ र १२ नै पढ्न सकिने पनि उनको भनाइ थियो । हाललाई कम्प्युटर साइन्स र विजनेश स्टडी अर्थात म्यानेजमेन्ट पढाइरहेको युनिकले आगामी वर्षबाट भने कानूनको विषय पनि थप्ने योजना बनाउँदै रहेछ ।
इटहरी, तरहरा तथा झुम्काको पेरिफेरीमा लामो अध्यापन अनुभव भएका नाम चलेका शिक्षकहरु आफूहरुसँग भएको र त्यस कारण पनि युनिक एकेडेमी दश जोड २ का लागि अब्बल रहेको दाबी सञ्चालकको छ । विद्यार्थीहरुले पढाइ मात्र नभएर भौतिक पूर्वाधार तथा अतिरिक्त गतिविधिलाई पनि चासोका साथ हेर्ने गरेकाले आफूहरुले क्रिकेट र फुटबलको ग्राउण्ड चाँडै पायक पर्ने स्थानमा बनाउने योजना रहेको युनिक एकेडेमीका प्रबन्ध निर्देशक राकेश रायले सुनाए । यसअघि नै युनिकसँग भलिबल, बास्केटबल, टेबल टेनिसजस्ता खेल पूर्वाधारहरु भएकाले विद्यार्थीलाई पढाइसँगै खेलसँग पनि जोडिरहेको एकेडेमीका कोअर्डिनेटर रामकुमार चौधरी बताउँछन् । ‘हामी गौरवका साथ भन्न सक्छौँ हालसम्म राम्रो रिजल्ट दिएका छौँ । अहिलेसम्म शिक्षकको स्थायित्वको प्रश्न पनि उठेको छैन । आफैँ लागेर पनि पढाइसँगै जोडिने कुराहरु थप्दै लैजान्छौँ । युनिकमा पढ्ने विद्यार्थी युनिक नै भएर निस्कन्छ नाटक, स्पोर्टस, डान्स, लगायतका अतिरिक्त क्रियाकलाप र अत्याधुनिक सुविधासम्पन्न भौतिक पूर्वाधार हाम्रा विशेषता हुन् । ’ हामीसँग छुट्नै लाग्दा थापाले सुनाए ।
_1720278409.jpg)
