इटहरीः बाबुलाई फलामको मुस्ली प्रहार गरी हत्या गरी फरार रहेका २४ वर्षीय टंकबहादुर भण्डारी पक्राउ परेका छन् ।

उनले हिजो बिहान बाबु ५३ वर्षीय भक्तबहादुर भण्डारीलाई घरायसी विवाद हुदाँ धान कुट्ने फलामको मुस्लीले टाउकोमा प्रहार गरी सख्त घाइते बनाई फरार भएका थिए । घाइते भक्तबहादुरको छथर अस्पताल शुक्रबारेमा उपचारको क्रममा हिजै बिहान ७ः१५ बजे मृत्यु भएको थियो ।

वारदातपश्चात् फरार रहेका अभियुक्त टंकबहादुलाई जिल्लाहरूमा जान सक्ने नाकाहरूमा जिल्ला प्रहरी कार्यालय तेह्रथुम, इलाका प्रहरी कार्यालय वसन्तपुरलगायत मातहत प्रहरी कार्यालयहरुबाट प्रहरी परिचालन गरी खोजतलास गर्दै जाँदा हिजै राति ९ः३० बजे तेह्रथुम म्याङलुङ नगरपालिका पिङ्गुवा खोलाको पुल आसपासको क्षेत्रमा फेला पारी पक्राउ गरिएको हो ।

पक्राउ परेका उनलाई मुलुकी अपराध संहिता, २०७४ अनुसार ज्यानसम्बन्धी कसुरमा तेह्रथुम जिल्ला अदालतबाट म्याद थप अनुमति लिई अनुसन्धान भइरहेको जिल्ला प्रहरी कार्यालय तेह्रथुमले जनाएको छ ।