खाँदवारीः सङ्खुवासभाको पाँचखपन नगरपालिका वडा नम्बर ६ वाना भाङ्टारमा श्री सिद्धदेवी पाथिभरा माताको प्राणप्रतिष्ठान निर्माण गरिएको छ ।
फागुन २१ बाट सुरु भएको प्राणप्रतिष्ठा विहिवार समापन गरिएको हो । पण्डित खेमनाथ दाहाल नेतृत्वको पण्डितहरुबाट विधिवत रुपमा देवीको प्राणप्रतिष्ठा गरेका थिए ।
पहिलो दिन सिद्धदेवी पाथिभरा माता र सिद्धेश्वर महादेवको साथै अन्य देवी देवताहरुको प्राणप्रतिष्ठाको लागि कलश यात्रा गरि सोही दिन जलवास गराईएको थियो ।
त्यसपछि अनादी वास, फलादी वास, घिर्तादी वास गर्दै विहिवार विधिवत रुपमा प्राणप्रतिष्ठा समापन गरिएको मन्दिर व्यवस्थापन समितिले बताएको छ ।
श्री सिद्धदेवी पाथिभरा संरक्षण संस्थाले आयोजना गरेको कार्यक्रममा पाँचखपन नगरपालिका र नगर वाहिरका भक्तजनहरुको उपस्थिति रहेको थियो । श्री सिद्धदेवी पाथिभरा माताको मन्दिर हालै सम्पन्न भएसँगै प्राणप्रतिष्ठा कार्यक्रमको आयोजना गरिएको संस्थाका देवराज पुरीले जानकारी दिए ।
देवीको प्राणप्रतिष्ठापछि पुजारीबाट दैनिक पुजापाठ गरिने समेत पुरीले जानकारी दिए । पुरीले यहाँ मन्दिर स्थापना भएसँगै आन्तरिक तथा बाह्य पर्यटकको आवागमन हुने बताए । यसले पाँचखपन मात्रै नभई संखुवासभा जिल्लालाई नै आर्थिक लाभ हुने बताएका छन् ।
_1720278409.jpg)
