भोजपुरः भोजपुरको टेम्केमैयुङ गाउँपालिका–९ मा रहेको पाँचधारे पोखरी संरक्षणको अभावमा जीर्ण बनेको छ । विसं १९४४ मा धनगञ्ज राईले स्थापना गरेको उक्त पोखरी स्थानीयवासी तथा सरोकारवाला निकायले बेवास्ता गर्दा जीर्ण बनेको हो ।
यसै पोखरीको नामबाट प्रत्येक महिना २ पटक यस ठाउँमा बजार समेत लाग्ने गर्दछ । पछिल्लो सयम पोखरीको संरक्षण नहुँदा यसको ऐतिहासिक महत्व नै हराउँदै गएको छ ।
पर्यटकीय स्थल टेम्के डाँडाको काखमा पर्ने यो पोखरीको संरक्षण तथा प्रचारप्रसार गर्न सके सयौँको सङ्ख्यामा पर्यटक भित्र्याउन सकिने स्थानीयवासीको भनाइ छ । स्थानीय नवराज माङपाहाङ भन्छन्, ‘पुर्खाले स्थापना गरेको यो पोखरी अहिले आएर जीर्ण बनेको छ, संरक्षणमा सरोकारवाला पक्षको ध्यान गएको छैन ।’
खोटाङ जिल्लाको सिमानामा पर्ने यस ठाउँबाट निकै मनोरम दृश्य देखिन्छ । यसको विकास, विस्तार तथा प्रचारप्रसार गर्न सके आन्तरिक एवं बाह्य पर्यटक भित्र्याउन सकिने स्थानीयवासी भीमकुमार राई बताउँछन् । ‘यो ठाउँले निकै ऐतिहासिक महत्व बोकेको छ, पोखरीको संरक्षण गरी यहाँका पर्यटकीय क्षेत्रको विषयमा जानकारी दिन सके गाउँपालिकाले लाखौँ आम्दानी गर्न सक्छ’, उनले भने ।
स्थानीय तहले पनि पोखरीको संरक्षणमा अहिले चासो देखाएको छ । गाउँपालिकाभित्र रहेका पर्यटकीय क्षेत्रको विकासका लागि गुरुयोजना बनाएर काम भइरहेको गाउँपालिका अध्यक्ष ध्रुवराज राईले जानकारी दिए । राईले भने, ‘यो पोखरी हाम्रो ऐतिहासिक सम्पदा हो, यसको संरक्षणका लागि हामी काम गर्छौँ । हाम्रो क्षेत्रमा पर्ने अन्य पर्यटकीय क्षेत्रको पनि गुरुयोजना बनाएर काम गर्ने सोचमा छौँ ।’
_1720278409.jpg)
