इटहरीः आज दिउँसो भएको हेलिकोप्टर दुर्घटनामा सवार ६ जनाको शव भेटिएको छ । शव आगोले पूरै जलेका कारण चिन्न नसक्ने अवस्थामा रहेको ताप्लेजुङ प्रहरीले जनाएको छ ।

प्रहरीका अनुसार हेलिकोप्टरको अगाडिको पूरै भाग जलेको छ । पुच्छरतर्फको थोरै भाग मात्र सग्लो अवस्थामा रहेको छ ।


तेह्रथुमको चुहानडाँडास्थित एयरपोर्टको निरीक्षण गर्न गएको टोली पाथीभराको दर्शन गरेर फर्कनेबित्तिकै निरक्षण टोली दुर्घटनामा परेको थियो ।

प्रहरीका अनुसार पाथीभरा मन्दिर नजिकै रहेको तारेभीरमा हेलिकोप्टर ठोक्किएर दुर्घटना भएपछि जङ्गलमा घाँस काट्न गएका स्थानीयले प्रहरीलाई खबर गरेका थिए ।