इटहरीः २०५४ सालमा इटहरीको पहिलो मेयर भए सर्वध्वज साँवा । २०५८ मा कार्यकाल सकिन लाग्दा इटहरीका कलाकर्मी विक्रमश्री, सोनु जयन्तीलगायतका कलाकारले इटहरी–५ मा रहेको जङ्गल क्षेत्रमा कलाकेन्द्र बनाउन चासो देखाए । तत्कालीन मेयर साँवाले सहयोग गरे । जङ्गल क्षेत्र रहेको उजाड क्षेत्र कलामय बन्यो । काव्यमय बन्यो । र, नामै राखियो– काव्यवाटिका ।

२०५९ सालमा मेयर साँवाको पदावधि सकियो । काव्यवाटिकामा सक्रिय विक्रमश्री र सोनु जयन्तीलगायतका कलाकार तितरबितर भए । सुन्दर काव्यवाटिका अव्यवस्थित भयो । आगन्तुकहरू जाने क्षेत्र सुनसानप्रायः हुन थाल्यो । स्थानीय सरकार आयो । कहिले क्यान्सर अस्पताल बनाउने त कहिले अन्य काम गर्ने भन्यो । बजेट राम्रोसँग पारिएन । घेराबारा गरेर जमिन र जङ्गलको सुरक्षाबाहेक आम्दानीमूलक काममा लगानी भएन ।

तर, १८ वर्षपछि सर्वध्वज साँवा पुनः काव्यवाटिकाको गिरेको शाख फर्काउन लागिपरेका छन् । गुमनाम तालतलैया क्षेत्रलाई इटहरीको प्रथम मेयर हुँदा पर्यटकीय क्षेत्र बनाउने उनी अहिले इटहरी २(क) को प्रथम प्रदेश सांसद छन् । मेयरको कार्यकालको अन्तिम समयमा केही थालिएको काव्यवाटिका बनाउन अहिले उनी लागिपरेका छन् ।

‘इटहरीका केही कलाकारको उत्साहमा हौसला दिएर काव्यवाटिका बन्यो, त्यो बेला नगरपालिकाको आम्दानी थोरै भएकाले ५० हजार व्यवस्था गरेको थिएँ’, सांसद साँवा भन्छन्, ‘१८ वर्षपछि प्रदेश सांसद भएपछि ६० लाखको योजना पार्न सफल भएको छु ।’

सोही ६० लाख रुपैयाँबाट काव्यवाटिकाले केही अनुहार फेर्ने आफ्नो विश्वास रहेको साँवा बताउँछन् । भन्छन्, ‘घेराबाराको काम भएकै छ अब चिल्ड्रेन पार्क बनाउने सोच छ ।’

३ बिघा हाराहारीको क्षेत्रफलमा फैलिएको काव्यवाटिकालाई सुन्दर पार्क बनाउने आफ्नो सोचाइ भएको साँवा बताउँछन् । उनी भन्छन्, ‘बालबच्चालाई पार्क घुमाउन टाढा लानुपर्ने अवस्था छ तर काव्यवाटिकामा पार्क बनेपछि नजिकै हुन्छ ।’

इटहरी नगरपालिकाबाट उपमहानगरपालिका भएको र आवादी पनि बढेकाले पार्कहरू आवश्यक भएको साँवाले बताए । उनले भने, ‘हरेक वडामा पार्क हुुनुपर्छ । एकैपटक नभए पनि क्रमशः बनाउनुपर्छ ।’

काव्यवाटिकाको मोडालिटीका बारेमा विज्ञसँग छलफल गरिने
प्रदेश सांसद साँवाले आगामी आर्थिक वर्षमा ६० लाख बजेटले काव्यवाटिकालाई के कस्तो बनाउने भन्ने बारेमा गुरुयोजना बन्ने बताए । प्रदेश १ का पर्यटन विज्ञहरूसँग छलफल गरेर गुरुयोजना बनाउने साँवाले बताए । उनले भने, ‘काव्यवाटिका पुरानो तरिकाले बनाएर हुँदैन । आकर्षक, अत्याधुनिक र कलात्मक बनाउनको लागि देशविदेशका राम्राराम्रा विज्ञसँग छलफल गरेर यसको मोडालिटी तयार हुनेछ ।’

स्थानीय, प्रदेश तथा सङ्घीय सबै सरकारको बल र बजेटमा काव्यवाटिकाको पर्यटकीय परियोजनाले मुहार फेर्ने तथा आम्दानी र रोजगारी दिने सांसद साँवाले बताए । भने, ‘नेपाल भ्रमण वर्ष सन् २०२० भएकाले त्यो बेलासम्म केही बनाउन सके धेरै राम्रो हुनेछ ।’