ताप्लेजुङः ताप्लेजुङको फक्तताङलुङ गाउँपालिकाले गाउँ-गाउँमा यातायात सेवाको पहुँच पुर्याएको छ ।
गाउँपालिकाले तमोर नदीमा चारवटा अस्थायी काठे मोटरेबल पुल निर्माण गरी गाउँ–गाउँमा यातायात सेवाको पहुँच पुर्याएको हो । फक्तताङलुङ गाउँपालिका तमोर नदीको दुई किनारमा पर्दछ । गाउँपालिकाको वडा नं १ सावादिन, वडा नं २ खेजेनिम, वडा नं ४ ईखाबु र वडा नं ६ लेलेप तमोर नदीको दायाँ भागमा पर्दछ । त्यस्तै वडा नं ३ लिङखिम, वडा नं ५ तापेथोक र वडा नं ६ लेलेपका सेकाथुम र अन्य गाउँ तमोर नदीको बायाँ किनारामा पर्दछ । एक गाउँबाट अर्को गाउँ आवतजावत गर्न तमोर नदी तर्नु पर्दछ । अहिले प्रायः सबै वडा सडक सञ्जालले जोडिएको छ ।
पक्की मोटरेवल पुल निर्माण सम्पन्न नभइन्जेल गाउँपालिकाले विगत तीन वर्षदेखि अस्थायी काठे मोटरेबल पुल निर्माण गर्दै आएको छ । अस्थायी काठे मोटरेबल पुलबाट गाउँपालिकाको वडा–वडा र गाउँ–गाउँसम्म गाडी सहजै पुग्दै आएको छ । घर आँगनमा गाडी आइपुग्दा स्थानीयवासी निकै खुसी भएका छन् । तमोर नदीको चार ठाउँमा अस्थायी मोटरेबल पुल निर्माण गरेर स्थानीयवासीलाई यातायातको पहुँच पुर्याएको गाउँपालिकाले यो वर्ष वडा नं १ सावादिन र वडा नं ३ लिखिम जोड्न तमोर नदीमा तीन लाख ७५ हजारको लागतमा अस्थायी काठे मोटरेबल पुल निर्माण गरेको छ । पुल निर्माणसँगै त्यस क्षेत्रका नौ सय एक घरपरिवार यातायातको सेवाबाट लाभान्वित हुने भएका छन् ।
यसैगरी गाउँपालिका–५ छिरुवा र वडा नं ४ इखाबु गाउँ जोड्न तमोर नदीमा तीन लाख ७५ हजारको लागतमा अर्को अस्थायी काठे मोटरेबल पुल निर्माण भएको छ । पुल निर्माणसँगै सो क्षेत्रका चार सय २२ घर परिवार प्रत्यक्ष लाभान्वित हुने भएका छन् । त्यस्तै गाउँपालिकाको केन्द्र तापेथोकदेखि वडा नं ६ साँघु जोड्न तमोर नदीमा स्थायी मोटरेवल पुल निर्माण भएको छ । यो पुल सञ्चालनमा आएपछि त्यस भेगका तीन सय घरपरिवार यातायात सेवाबाट प्रत्यक्षरुपमा लाभान्वित भएका छन् । तापेथोक र लेलेप जोड्ने रानी पुलमा बनेको अस्थायी काठे मोटरेबल पुल सञ्चालनमा आएपछि लेलेप, लुङथुङ, सेकाथुम फले, ग्याप्ला, घन्सा र ओलाङचुङगोलाका दुई सय ९९ घरपरिवार प्रत्यक्ष रुपमा यातायातको सेवाबाट लाभान्वित भएका छन् । स्थानीयवासीको आवागमनमा सहजता प्रदान गर्नका लागि काठे मोटरेबल पुल निर्माण गरिएको गाउँपालिका अध्यक्ष सरोज लिम्बूले बताए । -रासस
_1720278409.jpg)
