धरानः महिला ट्राफिकमाथि दुव्र्यवहार गरेको आरोपमा दुई जना युवालाई धरान प्रहरीले नियन्त्रणमा लिएको छ ।

पक्राउ पर्नेमा धरान–१५ का टीकाराम रसाइली र तारा दर्नाल रहेको इलाका प्रहरी कार्यालय धरानले जनाएको छ ।

बुधबार राती करिब ८ बजेतिर मापसे चेकिङको क्रममा ट्राफिक प्रहरी सावित्रा रेग्मीमाथि युवाहरूले हातपात गरेपछि उनीहरूलाई पक्राउ गरिएको इलाका प्रहरी कार्यालय धरानका प्रमुख डिएसपी सुमन तिम्सिनाले बताए ।

डिएसपी तिम्सिनाका अनुसार भानुचोकबाट दक्षिणतर्फ जाने क्रममा उनीहरू सवार को ११ प ८८७२ नम्बरको मोटरसाइकलले वडा प्रहरी कार्यालय धरानको पार्किङमा राखिएको को १ झ ९०९८ नम्बरको गाडीलाई ठक्कर दिएको थियो । ठक्कर दिएपछि उनीहरूमाथि मापसे चेक गर्ने क्रममा रेग्मीमाथि हातपातको प्रयास भएको थियो । पक्राउ परेका उनीहरूमाथि महिलामाथि दुव्र्यवहार गरेको अभियोगमा कारबाही प्रक्रिया अघि बढाइने डिएसपी तिम्सिनाले बताए ।