धरानः धरानको मुख्य चोक भानुचोकबाट लागूऔषधसहित १ जना युवा पक्राउ परेका छन् । पक्राउ पर्नेमा मोरङको पथरी–४ स्थायी घर भई हाल धरान–९ मा बस्दै आएका २५ वर्षीय मनोज माझी रहेको इलाका प्रहरी कार्यालय धरानले जनाएको छ ।

माझीको साथबाट लागूऔषध एभिल १५ एम्पुल, डाइजेल्याप १५ एम्पुल र लुपिजेसिक १५ एम्पुल फेला परेको इप्रका धरानका प्रमुख डिएसपी सुमन तिम्सिनाले जानकारी दिए ।

डिएसपी तिम्सिनाका अनुसार वडा प्रहरी कार्यालय धरानबाट खटिएको प्रहरी टोलीले भानुचोकमा शङ्कास्पद रूपमा हिँडिरहेका माझीको शरीर चेक गर्दा उक्त लागूऔषध फेला परेको थियो । माझीलाई इप्रका धरानमा राखी थप अनुसन्धान भइरहेको डिएसपी तिम्सिनाले बताए ।