धरानः गत शुक्रबार साँझ पेस्तोलसहित पक्राउ परेका युवालाई धरान प्रहरीले आज सार्वजनिक गरेको छ ।
इलाका प्रहरी कार्यालय धरानले सुनसरीको मधुवन–९ का ३५ वर्षीय श्यामदेव यादवलाई सार्वजनिक गरेको हो । पक्राउ परेका यादवको साथबाट १ थान पेस्तोल, खाली म्यागजिन १ थान र पेस्तोलमा लोड भएको अवस्थामा १ राउण्ड गोली फेला पारी बरामद गरिएको इलाका प्रहरी कार्यालय धरानका प्रमुख डिएसपी सुमनकुमार तिम्सिनाले बताए ।
डिएसपी तिम्सिनाका अनुसार धरानबाट इटहरीतर्फ को २८ प ७१७४ नम्बरको स्कुटरमा जाँदै गरेका यादवमाथि शङ्का लागी चेक गर्ने क्रममा धरान–८ स्थित तीनकुने प्रहरी पोष्टबाट पक्राउ गरिएको डिएसपी तिम्सिनाले बताए । उनले पेस्तोल कम्मरमा बाँधेका थिए भने खाली म्यागजिन पेन्टको बायाँ गोजीमा लुकाएको अवस्थामा प्रहरीले फेला पारेको थियो ।
गोप्य सूचनाको आधारमा पक्राउ परेका यादव हतियार कारोबारी भएको डिएसपी तिम्सिनाले बताए । उनलाई हातहतियार खरखजना अन्तर्गतको मुद्दामा आज म्याद थप गरी अनुसन्धान भइरहेको इलाका प्रहरी कार्यालय धरानले जनाएको छ । अनुसन्धामा बाधा पुग्ने भन्दै यसअघि उनको नाम प्रहरीले गोप्य राखेको थियो ।
_1720278409.jpg)
