काठमाडौँः श्रम, रोजगार तथा सामाजिक सुरक्षा मन्त्री शेरबहादुर कुँवरले सामाजिक सुरक्षा कोषको दुई वटा शाखा कार्यालयको भर्चुअल माध्यमबाट उद्घाटन गरेका छन् ।
मन्त्रालमा बुधबार एक कार्यक्रमको आयोजना गरी प्रदेश नम्बर १ को विराटनगर र मधेस प्रदेशको सिमरामा सञ्चालनमा ल्याइएका दुई वटा शाखा कार्यालयको उनले उद्घाटन गरेका हुन् । उद्घाटन कार्यक्रममा बोल्दै मन्त्री कुँवरले संघीयताको मर्मअनुसार सामाजिक सुरक्षा कोषलाई गतिशील बनाउनका लागि सो कार्यालयको स्थापना र सेवा शुभारम्भ गरिएको बताए । स्थानीय तहमा बस्ने श्रमिकलाई सेवा लिन काठमाडौं आउन समस्या हुने भएकाले पनि सेवा सहजताका लागि शाखा कार्यालयको स्थापना गरिएको उनले उल्लेख गरे ।
उनले भने, ‘संघीयताको मर्मअनुसार दुई वटा शाखा कार्यालय विस्तार गरिएको हो । र, यो आवश्यकताअनुसार विस्तार गर्दै लगिनेछ । म रोजगार दाताहरूलाई योगदानकर्ताहरूलाई आग्रह गर्न चाहन्छु सामाजिक सुरक्षा कोषमा आबद्ध होऔँ । कतिपय रोजगारदाताहरू, कतिपय घोषित क्षेत्रहरू पनि सामाजिक सुरक्षा कोषमा आबद्ध नभएको हामीले देखेका छौँ । सबैलाई कानुन, नियम, विधि, विधानअनुसार कोषको दायरामा ल्याइनेछ ।’
उनले सो कोषमा आबद्ध हुन सबै रोजगारदाता र योगदानकर्ताहरूलाई आग्रहसमेत गरेका छन् । कार्यक्रममा बोल्दै मन्त्रालयका सचिव एकनारायण अर्यालले सामाजिक सुरक्षा कोषको सेवा काठमाडौँमा मात्रै नभई स्थानीय तहसम्म विस्तार गर्ने योजना रहेको बताए । उनले आज मात्रै मन्त्रालयमा कोषको सञ्चालक समितिको बैठकले नेपालगञ्जं र बुटवलमा कोषको सम्पर्क कार्यालय स्थापना गर्ने निर्णय गरेको जानकारी गराएका छन् ।
साथै उनले कोषले निकट भविष्यमै श्रमीकका बच्चाहरुलाई अध्ययनका लागि छात्रवृत्ति दिने व्यवस्थासमेत गर्ने तयारी गरेको बताए । नयाँ शाखा कार्यलयहरुको स्थापनाले सामाजिक सुरक्षा प्रणालीमा पहुँच वृद्धि हुने विश्वास कोषले लिएको छ ।
_1720278409.jpg)
