इटहरी/ इटहरी प्रहरीले २ महिनाको अवधिमा चोरीमा संलग्न ४४ जना व्यक्तिलाई पक्राउ गरेको जनाएको छ ।
मंगलबार इलाका प्रहरी कार्यालयमा आयोजित पत्रकार सम्मेलनमा जनाइए अनुसार पक्राउमध्ये १५ जनाविरुद्ध चोरी मुद्दा दर्ता गरिएको छ । इलाका प्रहरी कार्यालय इटहरीका प्रमुख शिवनारायण श्रेष्ठका अनुसार मुद्दा दर्ता भएकामध्ये १ जना फरार छन् । १५ जनामध्ये ५ जनालाई अदालतमा पेश गरिसकिएको छ ।
२४ जना विरुद्ध उजुरी नै नपरेको तथा ५ जना सडक बालकलाई अनुसन्धानपछि छाडिसकिएको श्रेष्ठले बताए । ‘२४ जना चोरविरुद्ध उजुरी नै परेको छैन । त्यस्तै ५ जना सडक बालक भएकाले उनीहरूलाई सम्झाइबुझाइ छाडिसकिएको छ’, श्रेष्ठले भने, ‘१० वर्ष भन्दा कम उमेरका बालबालिकालाई मुद्दा चलाउन पाइँदैन ।’
प्रहरीले पक्राउ परेका व्यक्तिको साथबाट नगद ८४ हजार ३ सय रुपैयाँ, एउटा ल्यापटप, एउटा डिजिटल क्यामरा र १४ वटा मोबाइल बरामद गरेको जनाएको छ ।
त्यस्तै, एउटा मोटरसाइकल, दुई वटा साइकल र चस्मा तथा घडी १÷१ वाट बरामद गरेको श्रेष्ठले जानकारी दिए ।
बरामद भएका १० वटा सामानको सम्बन्धित व्यक्ति फेला नपरेको प्रहरीले जनाएको छ । प्रहरीका अनुसार ८ वटा मोबाइल, एउटा ल्यापटप र एउटा क्यामराको सम्बन्धित धनी पत्ता लाग्न नसकेका हुन् ।
_1720278409.jpg)
