विराटनगरः लागूऔषधसहित प्रहरीले सोमबार १ युवकलाई पक्राउ गरेको छ । मोरङको विराटनगर महानगरपालिका–१६ हुलास मेटल चोकबाट प्रहरीले लागूऔषधसहित भक्तपुरको अनन्तलिंगेश्वर –४ बस्ने राजेश न्यौपानेलाई पक्राउ गरेको हो ।

इलाका प्रहरी कार्यालय रानीबाट खटिएको प्रहरी टोलीले पैदल हिँडिरहेका न्यौपानेमाथि शङ्का लागि जाँच गर्ने क्रममा लागूऔषध फेला परेको बताइएको छ । शरीरको विभिन्न भागमा लुकाइराखेको अवस्थामा नाइट्रोजन ट्याब्लेट १ सय चक्की र नाइट्राभेट ६ सय चक्की फेला पारी बरामद गरेको बताइएको छ ।

उनलाई इलाका प्रहरी कार्यालय रानीमा राखी थप अनुसन्धान भइरहेको प्रहरीले जनाएको छ ।