इटहरीः प्रदेश पोर्टल डटकमका कार्यकारी सम्पादक प्रकाश बञ्जरा ‘उत्कृष्ट सञ्चारकर्मी पुरस्कार २०७८’ बाट आइतबार पुरस्कृत भएका छन् ।

इटहरी–१६, सुनसरी स्थित किसान कल्याण बचत तथा ऋण सहकारी संस्थाले हरेक वर्ष प्रदान गर्दै आएको पुरस्कार यस वर्ष बञ्जरालाई प्रदान गरिएको हो  । 

आईतबार संस्थाको २७ औं स्थापना दिवसको अवसर पारेर उक्त पुरस्कार प्रदान गरिएको हो । प्रदेश सहकारी रजिष्ट्रार हरिबहादुर खत्री र संस्थाका अध्यक्ष सालिकराम ढकालले संयुक्त रुपमा बञ्जरालाई सम्मान पत्र र नगद प्रदान गरेका थिए ।

सहकारीले समुदायको आर्थिक तथा सामाजिक रुपान्तरणमा गरेको योगदानलाई सञ्चार माध्यमबाट सम्प्रेषण गरी सहकारीको शाख वृद्धिमा पुर्याएको योगदानको उच्च मुल्यांकन गर्दै पुरस्कृत गरिएको संस्थाले जनाएको छ । बञ्जरा विगत १५ वर्षदेखि आर्थिक पत्रकारितामा क्रियाशिल रहँदै आएका छन् ।