इटहरी/ इटहरीस्थित जनता बहुमुखी क्याम्पसमा गरिएको नियुक्तिको विषयमा उच्च अदालत विराटनगरले कारण देखाऊ आदेश जारी गरेको छ । एक पदमा दुई जनालाई नियुक्ति गरिएको विषयमा परेको निवेदनमाथि फैसला गर्दै १५ दिनभित्र लिखित प्रमाण पेश गर्न अदालतले आदेश जारी गरेको हो ।
क्याम्पसलाई आधार र कारण खुलाई लिखित जवाफ पेश गर्न भनिएको छ । इटहरी ५ का तेजबहादुर परियारले दिएको निवेदनमाथि यस्तो आदेश जारी भएको हो ।
परियारले साउन ७ गते दिएको निवेदनमा क्याम्पस, क्याम्पस प्रमुख भोजराज श्रेष्ठ, पदपूर्तिका संयोजक चन्द्र भट्टराई, सदस्य विकास केसी, सदस्य उद्धवप्रसाद पौडेल, सदस्य युगप्रिय निरौला, शारदा पोखरेल, सृष्टि भट्टराई र सञ्चालक समितिललाई विपक्षी बनाइएको छ ।
धाँधली गरेर परीक्षामा कम अंक दिएर परियारको श्रीमती पबित्रा दर्नाललाई पास नबनाएको पवित्राको दाबी छ । परियारले नागरिक ऐन २०१२ को दफा ३,४,५ (क), ६ (७) ले प्रदान गरेको कानुनी अधिकार विपक्षीले हनन गरेको बताएका छन् ।
पुस्तकालय सहायकको पदपूर्ति हुँदा समितिका संयोजक चन्द्र भट्टराईकी छोरी सृष्टि र सदस्य विकास केसीको श्रीमती शारदा पोखरेललाई नियुक्त गरिएको थियो ।
_1720278409.jpg)
