धरानः बीपी कोइराला स्वास्थ्य विज्ञान प्रतिष्ठानभित्र पार्किङमा रहेको चिकित्सकको गाडीमा अज्ञात व्यक्तिले तोडफोड गरेका छन् । प्रतिष्ठानमा कार्यरत चिकित्सक बजरंग साहको बा २० च ३५११ नम्बरको गाडीमा तोडफोड गरी क्षति पुर्याइएको हो ।
गाडीमा ढुङ्गाले प्रहार गरेको देखिन्छ । गाडीमा प्रहार गरेको ढुङ्गा पनि सवारी साधन नजिकै भएको भन्दै गाडीको सम्पूर्ण सिसा फुटाइदिएको साहले गुनासो गरे । उनले गाडीको अगाडि, पछाडि र साइडको भागमा नोक्सानी पुर्याइएको जानकारी दिए ।
बिहीबार बेलुका भएको घटना धरान प्रहरी प्रमुख डिएसपी सुमन तिम्सिना बस्ने क्वाटर भन्दा करिब १ सय मिटरको दूरीमा रहेको छ । प्रहरी र बीपीको आन्तरिक सुरक्षामा केटीएम सेक्युरिटीसमेत खट्ने हुँदा सुरक्षा चुनौती बढेको हो कि भन्ने आशङ्का पैदा भएको चिकित्सक बताउँछन् ।
यता, डीएसपी तिम्सिना भने व्यक्ति पहिचान भइसकेको तर, उजुरी नआएको बताउँछन् । ‘मैले बुझेसम्म उहाँले पनि त्यो व्यक्तिलाई चिन्नुहुन्छ रे । तर, उजुरी त आउनु पर्यो नि,’ डीएसपी तिम्सिनाले भने ।
_1720278409.jpg)
