बेलबारीः पूर्व प्रधानपञ्च असित राईले बेलबारी नगरपालिका वडा नम्बर ४ का कार्यालय सहयोगी होम कार्कीलाई कुटपिट गरेका छन् । बेलबारी ४ बुधबारेमा रहेको वडा कार्यालयमा आफ्ना साला गोबर्धन राइको बसाइँसराइको कागजात बनाइदिन पुगेका राईले मंगलबार कार्कीलाई हातपात गरेका थिए ।
गोबर्धनको बसाइँसराइको कागजात लिन खोज्दा गोबर्धनकी जेठी श्रीमती गोमा राई आएर आफुले पाउनुपर्ने पेन्सन छल्नको लागि बनाउन खोजिएको बसाइँसराइको कागज च्यातिदिएपछि भएको बिवादमा कार्यालय सहयोगी कार्की पिटिएका हुन् ।
कागज बनाउन खोज्दाखोज्दै बसाइँ सराइ गर्न खोज्ने ब्यक्ति गोबर्धनकी जेठी श्रीमती गोमा आइपुगेपछि कर्मचारीले गोमालाई बोलाएको आशंकामा राईले आफुमाथि हातपात गरेको पीडित कार्कीले गुनासो गरे । हातपात गरेपछि कार्यालय सहयोगी कार्की बाहिर निस्केका थिए । उनी बाहिर निस्केपछि त्यही रहेकी गोबर्धनकी श्रीमती गोमालाईसमेत उनले कुटपिट गरेको प्रहरीले जनाएको छ ।
गोमाले नाताले श्रीमानको भिनाजु पर्ने असितले छातिमा लात्तीले हानेको बताएको प्रहरीले जनाएको छ । कुटपिट गर्ने राईलाइ प्रहरीले पक्राउ गरेको छ । राईविरुद्ध गोबर्धनकी जेठी श्रीमती गोमा र कार्कीले छुट्टाछुट्टै उजुरी दिएको र त्यसबारे अनुसन्धान भइरहेको ईलाका प्रहरी कार्यालय बेलबारीले जनाएको छ ।
पञ्चायत कालमा तत्कालीन बेलबारी गाउँ पन्चायतका प्रधानपञ्च भएका राई यसअघि भने विवादमा तानिएका थिएनन् ।
_1720278409.jpg)
