इलामः झापाको विर्तामोडबाट ताप्लेजुङ्गतर्फ जाँदै गरेको डिभिजन सडक कार्यालय ताप्लेजुङको बा १ झ ९८९८ नम्बरको गाडी इलाम नगरपालिका–४ स्थित सिम्लेमा दुर्घटना हुँदा पाँच जना घाइते भएका छन् ।

दुर्घटनामा परेर ताप्लेजुङ्ग स्थित फुङलिङ नगरपालिका–५ का ७४ वर्षिया धनमाया लिङदेन र तेह्रथुमकी ५० वर्षिय जानुका लिम्बु, फक्ताङलुङ गाउँपालिका–५ का ४५ बर्षिय पेम्बा शेर्पा, नुवाकोट ककनी गाउँपालिका–५ का १८ वर्षिय जंग तामाङ, सवारी चालक नुवाकोट ककनी गाउँपालिका–४ का २६ वर्षिय रितिक लामा घाइते भएका छन् ।

घाइतेहरुलाई जिल्ला अस्पताल इलाममा प्राथमिक उपचारपछि थप उपचारको लागि झापाको विएन्डसी अस्पताल लगिएको जिल्ला प्रहरी कार्यालय इलामका प्रहरी हवलदार बिजय राईले जानकारी दिए । मेची राजमार्गको पुवाखोला नजिकै सिम्ले भन्ने स्थानमा ब्रेक फेल भएर दुर्घटना भएको प्रहरीले जनाएको छ । गाडी सडकभन्दा अन्दाजी १५० मिटर तल खसेको छ ।

तस्विर स्राेतः जिल्ला प्रहरी कार्यालय इलाम