धरानः धरानको सिहंदेवी चोक नजिक फेला परेको शङ्कास्पद वस्तु डिस्पोज गरी पहिचानका लागि ल्याब पठाइएको छ ।

बमजस्तै देखिने उक्त शङ्कास्पद वस्तुलाई नेपाली सेनाको याङशिलास्थित कालिबक्स गणबाट आएको टोलीले डिस्पोज गरी फोरेन्सिक जाँचका लागि लगेको छ ।

धरानको वडा नं १ र १४ को सिमानामा पर्ने सिंहदेवी चोकबाट विजयपुर जाने बाटोको छेउमा उक्त वस्तु फेला परेको थियो । सो वस्तुमा केही विस्फोटक पदार्थजस्तो पदार्थ भेटिएकाले परीक्षण गर्न लगिएको नेपाली सेनाका अधिकारीले बताए ।

उनले थप जानकार नेपाली सेनाको सूचना केन्द्रले दिने बताए । सो वस्तुका बारेमा अनुसन्धान भइरहेको सेनाले बताएको छ ।