ताप्लेजुङ: संस्कृति, पर्यटन तथा नागरिक उड्डयन मन्त्री रविन्द्र अधिकारी सवार हेलिकप्टर दुर्घटना स्थलमा अति जोखिमपुर्ण रुपले खटिएका तीन जना प्रहरी फागुन महिनाको सर्वोत्कृष्ट प्रहरीमा घोषित भएकाछन् ।

फुङलिङ नगरपालिका स्थित माथिल्लो फेदीमा रहेको अस्थायी प्रहरी चौकिमा कार्यरत प्रहरी हवल्दार वेदकुमार अर्याल, प्रहरी जवान उपेन्द्र राई र प्रहरी जवान मनोज कुमार चौधरी फागुन महिनाको सर्वोत्कृष्ट प्रहरी घोषित भएका हुन् । उनिहरुको उत्कृष्ट कार्य सम्पादनको उच्च मूल्याङ्कन गर्दै फागुन महिनाको सर्वोत्कृष्ट प्रहरी अर्थात (वेष्ट पुलिस अफ द मन्थ) घोषित गरिएको एक नम्बर प्रदेश प्रहरी कार्यालयले जनाएको छ ।

अति जोखिम रहेको हेलिकप्टर दुर्घटना स्थलमा आफ्नो जिउ ज्यानको प्रवाह नगरि उच्च मनोबलका साथ उद्धार तथा खोजतलास र शव संकलन गर्ने कार्यमा खटिएको भन्दै फागुन महिनाको उत्कृष्ट प्रहरीमा छनौट गरिएको सो कार्यालयले बताएको छ ।

सर्वोत्कृष्ट हुने प्रहरी कर्मचारीलाई पुरस्कृत गरि उत्कृष्ट कार्यको विवरण सहितको फ्लेक्स प्रिण्ट प्रदेश प्रहरी कार्यालय बिराटनगरमा साथै प्रदेश अन्तरगत रहेका ईलाका प्रहरी कार्यालय (क) स्तरका प्रहरी कार्यालयमा १ महिना सम्म राखिदै आएको बताईएको छ ।